Բուրկինա Ֆասոյի հյուսիսում գտնվող բանակային բազայի վրա զինված անձանց հարձակման հետևանքով սպանվել է մոտ 50 զինվոր։ Բուլսա դեպարտամենտի (Նամենտենգա նահանգ) Դարգո գյուղի մոտակայքում գտնվող զինված ուժերի բազայի վրա հարձակում է տեղի ունեցել, հաղորդում է Associated Press (AP) լրատվական գործակալությունը՝ հղում անելով տեղի համայնքի ներկայացուցիչներին։
Հաղորդվում է, որ հարձակումն իրականացրել են «Ջամաաթ Նուսրաթ ալ-Իսլամ վալ-Մուսլիմին» խմբավորման մոտ 100 զինյալներ, որոնք կապեր ունեն «Ալ-Քաիդա» ահաբեկչական կազմակերպության հետ:
AP-ի աղբյուրների փոխանցմամբ՝ ահաբեկիչները թալանել և այրել են բանակային բազան: Բուրկինա Ֆասոն 2015 թվականից ի վեր Արևմտյան Աֆրիկայում ահաբեկչական գործունեության էպիկենտրոնն է։
