Բրազիլիայի կառավարությունը մշակել է տնտեսական կայունությունը պահպանելու ծրագիր՝ ԱՄՆ-ի կողմից բրազիլական ապրանքների վրա օգոստոսի 1-ին 50% մաքսատուրքեր սահմանելուց հետո, հայտարարել է երկրի ֆինանսների նախարար Ֆերնանդո Հադդադը։ Նրա խոսքով՝ գործողությունների ծրագիրն արդեն պատրաստ է և մոտ ապագայում կարող է հաստատվել երկրի նախագահ Լուիս Ինասիո Լուլա դա Սիլվայի կողմից։
Այն ներառում է սակագներից տուժած ընկերությունների համար ֆինանսական օգնություն և բրազիլական արտահանման կառուցվածքը փոխելու միջոցառումներ։ «Դժվար է կանխատեսել որևէ կոնկրետ քայլ, քանի դեռ հայտնի չէ Միացյալ Նահանգների մաքսատուրքերի վերաբերյալ վերջնական որոշումը», – ասել է նախարարը։
«Այսօր մենք շատ ավելի շատ ապրանքներ ենք արտահանում մոլորակի այլ տարածաշրջաններ՝ Չինաստան և ասիական երկրներ։ Բրազիլիան Հարավարևելյան Ասիա է մատակարարում նույնիսկ ավելի շատ ապրանքներ, քան Եվրոպա», – ընդգծել է Հադդադը։
