ՀԷՑ-ի ՔՊ-ականացումը նոր թափ է ստանում։
Euromedia24-ի տեղեկություններով՝ օրերս «Հայաստանի էլեկտրական ցանցեր» ընկերության «Ղարս» մասնաճյուղի (Շիրակի մարզ) տնօրեն Գագիկ Ֆարզադյանը ազատման դիմում է գրել։
Մեր աղբյուրների փոխանցմամբ, Գյումրու իշխանական թևը նրան, այսպես ասած, այնքան է վատ դրության մեջ դրել, աշխատանքային անախորժություններ ստեղծել, որ վերջինս ստիպված է եղել ինքնակամ հրաժարականի դիմում գրել։
Մեր տեղեկություններով՝ ՀԷՑ-ի Շիրակի մասնաճյուղի նոր տնօրեն են ուզում նշանակել ՔՊ-ական ավագանու անդամ Սարիկ Մինասյանին, որը ավագանու ընտրություններում գլխավորում էր իշխող ուժի ցուցակը:
Ընդ որում, նկատենք, քանի որ ՀԷՑ-ը մասնավոր ընկերություն է, վերջինս կարող է միևնույն ժամանակ պահել նաև ավագանու մանդատը
Փորձեցինք տեղեկությունը ճշտել Սարիկ Մինասյանից, սակայն վերջինս չպատասխանեց հեռախոսազանգին:
Մեր աղբյուները փոխանցում են նաև, որ այս օրերին փորձում են ազատվել նաև մասնաճյուղի հին աշխատակիցներից և նրանց փոխարեն աշխատանքի են տեղավորում յուրայինների։
Հիշեցնենք, որ ՀԷՑ-ի ոդիսականը սկսվեց այն բանից հետո, երբ հունիսի 18–ին, վարչապետ Նիկոլ Փաշինյանը գործարար, ՀԷՑ–ի սեփականատեր Սամվել Կարապետյանի կալանավորումից ժամեր առաջ, հայտարարեց` հասունացել է պահը, երբ «Հայաստանի էլեկտրական ցանցեր» ՓԲԸ–ն պետք է ազգայնացվի (պետականացվի), իսկ օրեր հետո հայտարարեց՝ ՀԷՑ–ի պետականացման պլանը պատրաստ է։
Հուլիսի 18-ին հայտնի դարձավ, որ ՀԾԿՀ–ն պետական վերահսկողության ծառայության պետի պաշտոնից ազատված Ռոմանոս Պետրոսյանին նշանակել է «Հայաստանի էլեկտրական ցանցեր» ընկերության ժամանակավոր կառավարիչ։ Հանձնաժողովը նաև կառավարության ներկայացրած հաղորդման հիմքով վարույթ է հարուցել ՀԷՑ–ի նկատմամբ։
Քրիստինա Մուշեղյան
