Դոհայում Գազայի հատվածում հակամարտության կարգավորման վերաբերյալ խորհրդակցություններին մասնակցող միջնորդները աշխատում են հաղթահարել պաղեստինյան ՀԱՄԱՍ շարժման և Իսրայելի միջև առկա տարաձայնությունները, և դեռ վաղ է գնահատել բանակցային գործընթացը, հայտարարել է Կատարի վարչապետի խորհրդական, արտաքին գործերի նախարարության պաշտոնական ներկայացուցիչ Մաջիդ բին Մոհամմեդ ալ-Անսարին։
«Միակ բանը, որ կարող ենք ասել, այն է, որ երկու կողմերն էլ ներգրավված են գործընթացում: Մենք բանակցություններ ենք վարում երկու կողմերի հետ էլ: Ակնհայտ է, որ մեր խնդիրն է հաղթահարել նրանց միջև առկա տարաձայնությունները զգայուն հարցերի շուրջ», - ասել է ալ-Անսարին ճեպազրույցի ժամանակ՝ ընդգծելով, որ «դեռ վաղ է որևէ եզրակացություն անել բանակցությունների ընթացքի վերաբերյալ»:
Նրա խոսքով՝ կողմերից յուրաքանչյուրի հետ խորհրդակցություններ են անցկացվում՝ բանակցային գործընթացի շրջանակներում դիրքորոշումները պարզաբանելու համար։
