ԱՄՆ-ում կարմրուկի դեպքերի թիվը հասել է վերջին 33 տարվա ամենաբարձր մակարդակին, ավելի քան 1277 հաստատված դեպք է գրանցվել 38 նահանգներում և Կոլումբիայի շրջանում, հաղորդում է Washington Post-ը՝ հղում անելով Ջոնս Հոփքինսի համալսարանի համաճարակների արձագանքման նորարարական կենտրոնի տվյալներին։
«Միացյալ Նահանգները հասել է կարմրուկի տարեկան դեպքերի ամենաբարձր ցուցանիշին վերջին 33 տարվա ընթացքում՝ առնվազն 1277 հաստատված դեպքով 38 նահանգներում և Կոլումբիայի շրջանում», - ասվում է հրատարակության մեջ։
Ամենամեծ բռնկումը տեղի է ունեցել Արևմտյան Տեխասում, որտեղ հունվարից ի վեր հայտնաբերվել է ավելի քան 750 դեպք: 2025 թվականի սկզբից կարմրուկի հետ կապված բարդություններից մահացել է նաև երեք մարդ, այդ թվում՝ երկու առողջ երեխա Տեխասում և մեկ տղամարդ Նյու Մեքսիկոյում, որոնք բոլորն էլ չեն պատվաստվել:
Ըստ «Վաշինգտոն Փոստ»-ի՝ դեպքերի թվի նման կտրուկ աճը վկայում է կարմրուկի դեմ պայքարում լուրջ հետընթացի մասին՝ երկրում պատվաստումների դեմ տրամադրությունների աճի ֆոնին։
Հոդվածում նաև ընդգծվում է, որ Միացյալ Նահանգները կարող է կորցնել կարմրուկը վերացած համարվող երկրի կարգավիճակը, եթե վիրուսի փոխանցման շղթան տևի մեկ տարուց ավելի։
