ԱՄՆ նախագահ Դոնալդ Թրամփը կարող է երկուշաբթի օրը հայտարարել Գազայի հատվածում հրադադարի մասին, եթե Դոհայում Իսրայելի և Համասի ներկայացուցիչների մասնակցությամբ բանակցությունները հաջողությամբ պսակվեն, հաղորդում է The National-ը՝ հղում անելով աղբյուրներին։
Հուլիսի 6-ին Կատարի մայրաքաղաքում վերսկսվել են Իսրայելի և Համասի միջև հրադադարի և պատանդների ազատ արձակման վերաբերյալ անուղղակի բանակցությունները: Խորհրդակցությունները տեղի են ունենում Իսրայելի վարչապետ Բենիամին Նեթանյահուի՝ երկուշաբթի օրը նախատեսված Վաշինգտոն կատարելիք այցի ֆոնին:
Ինչպես նշում է հրատարակությունը, հրադադարի վերաբերյալ որոշումը կախված կլինի նրանից, թե արդյոք Իսրայելը և Համասը կկարողանան համաձայնության գալ Դոհայում անուղղակի բանակցություններից հետո։
Եթե հակամարտության կողմերը լուծեն համաձայնագրի որոշակի ասպեկտների վերաբերյալ տարաձայնությունները, ԱՄՆ նախագահը կհայտարարի ժամանակավոր հրադադար, կոչ կանի Համասին վայր դնել զենքը և ազատ արձակել բոլոր պատանդներին, The National-ին ասել է աղբյուրներից մեկը։
