Թուրքիայի նախագահ Թայիփ Էրդողանի վարչակազմը հերքել է այն տեղեկությունները, թե իբր հանրապետությունը այս տարվա առաջին հինգ ամիսներին Իսրայել է արտահանել 393,7 միլիոն դոլարի ապրանքներ։
«Որոշ լրատվամիջոցներում և սոցիալական ցանցերում տարածված այն պնդումը, թե «առաջին 5 ամիսների ընթացքում Թուրքիան Իսրայել է արտահանել 393,7 միլիոն դոլարի ապրանքներ», լիակատար սուտ և ապատեղեկատվություն է։
Այս միտումնավոր աղավաղումը ոչ այլ ինչ է, քան հասարակական կարծիքը մանիպուլյացիայի ենթարկելու և մեր պետության պաշտոնական ինստիտուտները վարկաբեկելու փորձ։
«2024 թվականի մայիսի 2-ին ընդունված որոշման համաձայն՝ թուրքական պետությունը դադարեցրել է Իսրայելի հետ բոլոր խմբերի ապրանքների արտահանման, ներմուծման և տարանցիկ առևտրային գործողությունները՝ առանց բացառության, ինչպես մաքսային կետերում, այնպես էլ ազատ գոտիներում», - ասվում է Թուրքիայի նախագահականի հաղորդակցության վարչության դեզինֆորմացիայի դեմ պայքարի կենտրոնի հայտարարության մեջ։
