ԱՄՆ նախագահ Դոնալդ Թրամփը հայտարարել է, որ վաղվանից սկսած՝ տասնյակ երկրներին նամակներ կուղարկի՝ օգոստոսի 1-ից ուժի մեջ մտնող նոր մաքսատուրքերի մասին տեղեկացնելու համար։
«Մենք սկսելու ենք նամակներ ուղարկել տարբեր երկրներ։ Վաղը, կարծում եմ, կուղարկենք 10 կամ 12 նամակ, իսկ հաջորդ մի քանի օրերին, կարծում եմ՝ մինչև (հուլիսի 9-ը), բոլորին։ Մաքսատուրքերը կլինեն գուցե 60 կամ 70%-ից մինչև 10 և 40%։
Մենք կազմել ենք վերջնական ձևը, և այն ճշգրտորեն բացատրում է, թե երկրները որքան են վճարելու։ Դա շատ կարևոր է, դա մեծ գումար է Միացյալ Նահանգների համար», - լրագրողներին ասել է Թրամփը։
Նա հավելել է, որ Միացյալ Նահանգները չի ցանկանում բարդացնել իրավիճակը և մտադիր է գործել «բանականության սահմաններում»։
Մեկ օր առաջ երկրի ֆինանսների նախարար Սքոթ Բեսենթը զգուշացրել էր երկրի առևտրային գործընկերներին բանակցությունների հետաձգման ռիսկերի մասին՝ նշելով, որ նման դեպքում ներմուծման մաքսատուրքերը կարող են վերադարձվել ապրիլի 2-ի մակարդակին։
