Ամերիկյան և իսրայելական հարվածները Իրանի միջուկային օբյեկտներին կարող են ստիպել Թեհրանին միջուկային զենք մշակել, ասվում է The Wall Street Journal (WSJ)-ի հոդվածում։
«Հակասական է, բայց մենք իրանցիներին ավելի շատ ենք համոզել միջուկային զենք ստեղծելու անհրաժեշտության մեջ», - հրատարակությանը ասել է Իրանի միջուկային համաձայնագրի շուրջ բանակցություններում ԱՄՆ պատվիրակության նախկին անդամ Ալան Էյրը՝ խոսելով իրանական միջուկային օբյեկտներին ԱՄՆ-ի հարվածների մասին: Նրա կարծիքով՝ Թեհրանն այժմ «մտածում է այն մասին, թե ինչպես վերականգնել նախկինը կամ մշակել նոր պաշտպանական ռազմավարություն»:
Թերթի տվյալներով՝ Իրանի քաղաքական ղեկավարության մի շարք ներկայացուցիչներ համոզված են, որ ատոմային ռումբը կլինի միակ զենքը, որը կարող է Իսրայելին և Միացյալ Նահանգներին հետ պահել Իսլամական Հանրապետության դեմ ագրեսիա իրականացնելու նոր փորձերից։
Ինչպես նշում են WSJ-ի կողմից հարցված փորձագետները, Իրանն ունի ուրանի հարստացումը շարունակելու տեխնոլոգիական և արտադրական հզորություններ, սակայն միջուկային զենք ստեղծելու հնարավոր ժամկետները չափազանց դժվար է որոշել։
