«Մինչ այս պահը իմպիչմենտի ձևաթղթի տակ կա բացառապես «Պատիվ Ունեմ» խմբակցության անդամների 6 ստրագրությունները: Ես չգիտեմ՝ որտե՞ղ են «Հայաստան» դաշինքի անդամների ստորագրությունները, հարցրեք իրենց, միգուցե ասե՞ն… մենք շարունակելու ենք այս գործընթացը, ինչ էլ լինի»,- այս մասին այսօր Կոմիտասի անվան պանթեոնում լրագրողների հետ զրույցում ասաց Մասիսի քաղաքապետ Դավիթ Համբարձումյանը, ում հարազատ ՀՀԿ-ն առաջադրել է իմպիչմենտի թեկնածու և սպասում է այս թեկնածուի շուրջ ընդդիմադիր ուժերի կոնսոլիդացմանը:
Դավիթ Համբարձումյանը վստահ պնդում է, որ ամռան սեզոնը չի խանգարի ընդդիմությանը հնարավոր քաղաքական գործընթացներ սկսելուն, անգամ ուշացող ստորագրությունները մեծ խոչընդոտ չեն գոնե այս փուլում։
«Մինչ իմփիչմենտի գործընթացի իրավական քայլերով հաջողության հասնելը՝մենք կգնանք նաև փողոցային պայքարի և ես տեսնում եմ այդ տրամադրություները հասարակության շրջանում՝ իմ ամենօրյա շփումների ու աշխատանքային հանդիպումների միջոցով»:
Իսկ ինչպե՞ս է պատկերացնում փոփոցային պայքարի գեներացումը հիմա՝ այսքան անհաջող փորձերից հետո, հետաքրքրվեցին լրագրողները: Նրա խոսքով ժողովրդական ցասումը մեծ է, կա հանրային մեծ դժգոհություն իշխանություններից, իսկ սեզոնն ամենևին էլ, ըստ Համբարձումյանի, խոչընդոտ չէ:
«Մեր քաղաքական հաշվարկներն այնքան ճշգրիտ են արված, որ հաշվի ենք առել հանգստի սեզոնը: Մենք ամենինչ այնպես կկազմակերպենք, որ, ասենք, Դուբայ և Սև ծով գնացողները մեզ չեն խանգարի»,-նշեց Համբարձումյանը:
Դավիթ Համբարձումյանը նշեց, որ կողմ չէ համացանցում իմպիչմենտի թեմայով անառողջ քննարկումններին, բայց չի թաքցնում նաև իր տարակուսանքը երեկ երեկոյան «Հայաստան» դաշինքի պատգամավորների ստորագրահավաքի հրապարակման կիսահեգնական գրառումներին, որոնք «Պատիվ ունեմ»-ի կողմից որակվեցին քաղաքական մանիպուլյատիվ քայլ:
Լրագրողները, հղում անելով տարբեր գործիչների հնչեցրած կարծիքներին, հետաքրքրվեցին՝ Փաշինյանի ստեղծած անվտանգային իրավիճակից ելնելով արդյո՞ք ի վիճակի է Դավիթ Համբարձումյանը դուրս բերել երկիրն այս վիճակից, նա կարճ պատասխանեց. «Գահավիժող պրոցեսը կանգ է առնելու, մեր նպատակը հանրային կոնսեսուս ստեղծելն է և համերաշխություն ձևավորելը, մենք գալիս ենք, որ կանգ առնի գահավիժումը, ատելությունը հասարակության մեջ»,-նշեց Դավիթ Համբարձումյանը:
