Ուկրաինան դեռևս սպասում է ԱՄՆ-ի պատասխանին՝ ՀՕՊ համակարգեր գնելու առաջարկի վերաբերյալ, հայտարարել է նախագահ Վլադիմիր Զելենսկին երեկոյան տեսաուղերձում։
«Մենք աշխատում ենք, որպեսզի ավելացնենք ուկրաինական ՀՕՊ-ը։ ԱՄՆ–ի կողմից դրական ազդանշանները շատ են անհրաժեշտ․ կոնկրետ ազդանշաններ ՀՕՊ-ի վերաբերյալ։ Մենք դեռևս սպասում ենք համակարգերը գնելու առաջարկի պատասխանին, որոնք շատ կօգնեն։ Կոնկրետ ազդանշաններ, այլ ոչ թե խոսքեր», - ասել է նա։
Միևնույն ժամանակ, Զելենսկին շնորհակալություն է հայտնել եվրոպական երկրներին Ուկրաինային ՀՕՊ համակարգեր մատակարարելու համար։
«Մենք պետք է արդյունքների հասնենք ՀՕՊ համակարգերի համատեղ արտադրության, դրանց համար հրթիռների արտադրության գործում. դա բացարձակապես անհրաժեշտություն է մեր ամբողջ Եվրոպայի համար։ Միայն ժամանակն է մեզ բաժանում այս արդյունքից, և գլխավորն այն է, որ այս ժամանակը կրճատվի», - հավելել է նախագահը։
