Վրաստանի վարչապետ Իրակլի Կոբախիձեն Եվրախորհրդարանի կողմից ընդունված հակավրացական բանաձևերը անվանել է անհետաքրքիր, իսկ կառույցում ստեղծված իրավիճակը՝ ողբերգական։
«Եվրոպական խորհրդարանի բանաձևերը բացարձակապես անհետաքրքիր են. եթե ինչ-որ բան նման է խորհրդային ինստիտուտի, ապա, ցավոք, դա Եվրախորհրդարանն է, որը ոչնչով չի տարբերվում ԽՍՀՄ Գերագույն խորհրդից։
Ես հիշում եմ նրանց պաթոսը 80-ականներին, քննարկումների բովանդակությունը, անարդարության աստիճանը, ցավոք, այսօրվա Եվրոպական խորհրդարանը ոչնչով չի տարբերվում այս ամենից։ Հուսով եմ, որ վերականգնման և փոփոխությունների գործընթացը առաջին հերթին կանդրադառնա Եվրոպական խորհրդարանի վրա։ Սա շատ տխուր և մտահոգիչ է, այն իրավիճակը, որը մենք տեսնում ենք Եվրոպական խորհրդարանում, ողբերգական է», - լրագրողներին ասել է վարչապետը։
Եվրոպական խորհրդարանը բազմիցս մտահոգություն է հայտնել «Վրացական երազանքի» գլխավորած կառավարության գործողությունների վերաբերյալ՝ ընդունելով մի շարք բանաձևեր, որոնցում քննադատվում է երկրի շեղումը ժողովրդավարական նորմերից և եվրոպական ուղուց։
