Եմենի «Անսար Ալլահ» ապստամբ շարժման հութիները հայտարարել են Թել Ավիվի Բեն Գուրիոն օդանավակայանի վրա նոր հարձակման մասին։ Համապատասխան հաղորդագրությունը հրապարակվել է ապստամբների կողմից ձևավորված զինված ուժերի ներկայացուցիչ Յահյա Սարիայի Telegram ալիքում։
Տեքստի համաձայն՝ հարվածը հասցվել է հիպերձայնային բալիստիկ հրթիռի միջոցով։ Օդանավակայանի գործունեությունը որոշ ժամանակով խափանվել է։
Հութիները վստահեցրել են, որ կշարունակեն «կատարել իրենց կրոնական, բարոյական և մարդասիրական պարտքը» պաղեստինցիների նկատմամբ և չեն դադարեցնի Իսրայելի տարածքում գտնվող թիրախների վրա հարձակումները, քանի դեռ չի դադարեցվել Իսրայելի կողմից պաղեստինյան ժողովրդի դեմ սանձազերծված ագրեսիան։
Ավելի վաղ Իսրայելի պաշտպանության ուժերի մամուլի ծառայությունը հայտնել էր Եմենի տարածքից արձակված հրթիռի որսման մասին։ Դրա կապակցությամբ հրեական պետության մի շարք շրջաններում հայտարարվել է օդային հարձակման տագնապ։
