Միացյալ Նահանգները անհամաչափ է եղել Իրանի հետ բանակցություններում, ինչը դժվարացնում է իրանական միջուկային ծրագրին վերաբերող հարցերի լուծումը։ Այս մասին հայտարարել է հանրապետության արտաքին գործերի փոխնախարար Մաջիդ Թախտ-Ռավանչին։
«Ամերիկյան բանակցային ձևը յուրահատուկ է։ Նրանք անընդհատ փոխում են իրենց դիրքորոշումը։ Երբեմն նախագահ Թրամփն ասում է, որ ցանկանում է համաձայնագիր Իրանի հետ, իսկ մեկ-երկու օր անց սպառնում է Իրանին։ Ամերիկացիները պետք է ընտրեն, թե ինչ են ուզում՝ առճակատում, թե համաձայնագիր»,-ասել է նա Der Spiegel-ին տված հարցազրույցում։
Նա ասել է, որ մեկուկես ամիս առաջ ԱՄՆ-ը առաջարկեց, որ Իրանը ուրանի հարստացումը հասցնի 3.67%-ի։ Ավելի ուշ ԱՄՆ նախագահի հատուկ դեսպանորդ Սթիվեն Ուիթկոֆը հայտարարեց, որ Թեհրանը պետք է ընդհանրապես հրաժարվի ուրանի հարստացումից։ Դիվանագետի խոսքով՝ Իրանը պատրաստ չէ քննարկել հարստացման լիակատար դադարեցման հարցը։
Իրանի արտաքին գործերի նախարար Աբբաս Արաղչին ուրբաթ օրը ժամանել է Հռոմ՝ Թեհրանի միջուկային ծրագրի շուրջ ԱՄՆ պաշտոնյաների հետ անուղղակի բանակցություններ վարելու համար։
