Գերմանիայի կանցլեր Ֆրիդրիխ Մերցը հեռախոսազրույց է ունեցել Չինաստանի նախագահ Սի Ծինփին հետ, որի ընթացքում աջակցություն է խնդրել Ուկրաինայում հրադադարի արագ հաստատման ջանքերին։ Այս մասին Բեռլինում լրագրողներին հայտնել է Գերմանիայի կաբինետի պաշտոնական ներկայացուցիչ Ստեֆան Կոռնելիուսը։
«Երկու առաջնորդներն էլ կարծիքներ են փոխանակել միջազգային և տարածաշրջանային հարցերի շուրջ»,-ասել է նա՝ նշելով, որ քննարկվել է նաև Ուկրաինայի հակամարտությունը։ «Կանցլերը տեղեկացրել է Եվրոպայի և Միացյալ Նահանգների համատեղ ջանքերի մասին՝ արագ հրադադարի հասնելու համար։ Նա կոչ է արել աջակցել այդ ջանքերին»,-ասել է Կոռնելիուսը։
Նրա խոսքով՝ Մերցը և Սի Ծինփինը ընդգծել են համաշխարհային մարտահրավերները հաղթահարելու համար համատեղ աշխատելու իրենց պատրաստակամությունը և ընդգծել Գերմանիայի և Չինաստանի միջև տնտեսական հարաբերությունների կարևորությունը։ Միևնույն ժամանակ, Մերցը նշել է արդար մրցակցության կարևորությունը։
«Կանցլերը և ՉԺՀ նախագահը համաձայնության են եկել մոտ ապագայում շարունակել ուղիղ երկխոսությունը՝ գերմանա-չինական համագործակցության հետագա զարգացման նպատակով», - եզրափակել է Գերմանիայի կաբինետի ներկայացուցիչը։
