Թեհրանը, չնայած ԱՄՆ նախագահ Դոնալդ Թրամփի՝ ուժ կիրառելու սպառնալիքներին, կշարունակի բանակցությունները Վաշինգտոնի հետ, բայց երբեք չի հրաժարվի խաղաղ միջուկային էներգիայի զարգացման իր իրավունքից։ Այս մասին հայտարարել է Իսլամական Հանրապետության նախագահ Մասուդ Փեզեշքիանը։
«Մի կողմից Թրամփը խոսում է տարածաշրջանում խաղաղության մասին, մյուս կողմից՝ սպառնում է մեզ և պնդում, որ բռնության աննախադեպ գործիքներ ունի։
Նրա խոսքերից որի՞ն պետք է հավատանք՝ խաղաղության մասին խոսքերին, թե սպանությունների և մարդկանց ոչնչացման մասին խոսքերին։ Մենք պատերազմ չենք փնտրում, բայց երբեք չենք վախենա սպառնալիքներից։Մենք բանակցելու ենք, բայց երբեք չենք հրաժարվի ռազմական, գիտական և միջուկային ոլորտներում մեր ձեռքբերումներից»,- նշել է Փեզեշքիանը երկրի ռազմածովային ուժերի ղեկավարության հետ հանդիպմանը։
Ավելի վաղ Թրամփը կարծիք էր հայտնել, որ Իրանը միջուկային տեխնոլոգիաների կարիք չունի, քանի որ նա արդեն հարուստ է նավթով։
Նախկինում ամերիկացի առաջնորդը պնդում էր, որ պատրաստ է «մահաբեր հարված» հասցնել Իրանին՝ հանրապետության միջուկային զենք ձեռք բերելը կանխելու համար՝ միաժամանակ նշելով, որ կնախընտրեր խնդրի դիվանագիտական լուծումը։
