Իսրայելական բանակը ակտիվացրել է հարձակումները Գազայի հատվածի վրա եւ պատրաստվում է ընդլայնել այնտեղ իրականացվող ռազմական գործողության մասշտաբները։ Այս մասին ասված է բանակի մամուլի ծառայության հաղորդագրության մեջ։
«Վերջին օրվա ընթացքում Իսրայելի պաշտպանության բանակը սկսել է զանգվածային հարվածներ հասցնել և զորքեր մոբիլիզացնել Գազայի հատվածում օպերատիվ հսկողություն հաստատելու համար՝ նախապատրաստվելով գործողությունների ընդլայնմանը և պատերազմի նպատակներին, ներառյալ պատանդների ազատագրմանը և ՀԱՄԱՍ ահաբեկչական կազմակերպության վերացմանը», - ասել են զինվորականները:
«Իսրայելական բանակը կշարունակի գործել իսրայելցի խաղաղ բնակիչներին պաշտպանելու և պատերազմի նպատակներին հասնելու համար», - հավելել է մամուլի ծառայությունը։
Բանակը նշել է, որ սա նախկինում հայտարարված «Գեդեոնի կառքերը» ծածկագրված գործողության առաջին փուլն է։ Ինչպես ավելի վաղ հայտնել էր «Կան» պետական հեռուստաընկերությունը, ընդլայնված ռազմական գործողության նպատակը կլինի «Համասի պարտությունն ու խաղաղեցումը Գազայի հատվածում» և «բոլոր պատանդների ազատումը»։
