ԱՄՆ նախագահ Դոնալդ Թրամփը Ռիադում Սիրիայի վարչակազմի նոր ղեկավար Ահմեդ ալ-Շարաայի հետ հանդիպմանը կոչ է արել սիրիական իշխանություններին կարգավորել հարաբերություններն Իսրայելի հետ Աբրահամի համաձայնագրի շրջանակներում և կանխել «Իսլամական պետություն» ահաբեկչական խմբավորման վերածնունդը (Ռուսաստանում արգելված ԻՊ): Այս մասին X-ում հայտնել է Սպիտակ տան մամուլի քարտուղար Քերոլայն Լևիտը։
Նրա խոսքով` ամերիկացի առաջնորդը «նախագահ ալ-Շարաային կոչ է արել մեծ աշխատանք կատարել սիրիացի ժողովրդի համար», ներառյալ` «Աբրահամի համաձայնագիրը ստորագրել Իսրայելի հետ» և «օգնել ԱՄՆ-ին կանխել ԴԱԻՇ-ի վերածնունդը»:
Լևիտը հավելել է, որ Թրամփը նաև պահանջել է, որ իր սիրիացի գործընկերը «հրամայի բոլոր օտարերկրյա ահաբեկիչներին լքել Սիրիան» և երկրից վտարել «Պաղեստինի հետ կապված ահաբեկիչներին»։
Ալ-Շարաան, իր հերթին, հույս է հայտնել, որ Սիրիան կարող է առևտրային օղակ դառնալ Արևմուտքի և Արևելքի միջև, ինչպես նաև «հրավիրել է ամերիկյան ընկերություններին ներդրումներ կատարել սիրիական նավթում և գազում», ասել է Սպիտակ տան մամուլի քարտուղարը։
Բացի այդ, կողմերը քննարկել են Ուկրաինայի և Գազայի հատվածի հակամարտությունները։
