Արցախի պատգամավորները պատրաստվում են նախագահական ընտրությունների: Սամվել Շահրամանյանի պաշտոնավարման ժամկետը 19 օրից կավարտվի: Արցախի խորհրդարանը կարծում է, որ պետական համակարգերը, թեկուզ վտարանդի, պետք է շարունակեն գործել:«Եվ շատ ավելի նախընտրելի է, որ մենք բոլորս կարողանանք, էսպես, կոնսենսուսային նախագահ ունենալ, ի սկզբանե հակված լինենք կոնկրետ անձի ընտրելու՝ պայմանավորված այն հանգամանքով, որ, նախ, պահպանվի Արցախի նախագահի ինստիտուտը, երկրորդ՝ նախագահը կենսունակ լինի, այդ ինստիտուտը կենսունակ լինի», – «Ազատության» հետ զրույցում հայտարարեց «Արդարություն» խմբակցության պատգամավոր Մետաքսե Հակոբյանը:
Արցախցիների իրավունքների ու վերադարձի հարցը առաջ մղելու, օրակարգում ակտիվ պահելու համար անհրաժեշտ է, որ տեղահանված ժողովուրդն ունենա առաջնորդ, նախագահի ինստիտուտը անխափան աշխատի, ասում է Հակոբյանը: Նրա խոսքով՝ միջազգային կառույցներում իրենց շարունակում են ընդունել որպես Արցախի ներկայացուցիչներ:
«Հիմա շատ շատերի մոտ հարց է առաջանում՝ լավ, ինչի է պետք Արցախի պետական ինստիտուտները: Միջազգային հանրությունը ինքը հակված է և տեսնում է, թեկուզ և իրենց ձևակերպումներում միգուցե Արցախի նախագահ չի, բայց իրենք մեզ բոլորիս ընկալում են որպես Արցախի լեգիտիմ ներկայացուցիչներ», – վստահեցրեց Մետաքսե Հակոբյանը:
Նախագահի թեկնածուի քննարկումները դեռ չեն հանգուցալուծվել: Հաջորդ շաբաթ պարզ կլինի՝ միասնակա՞ն, թե՞ առանձին թեկնածուներ են առաջադրելու: Սամվել Շահրամանյանի թեկնածության մասին ի՞նչ են մտածում: Հնարավո՞ր է՝ հակված են, որ ինքն էլ շարունակի:«Երևի Դուք ուղիղ պատասխան եք ուզում ինձնից, բայց ես հակված եմ, որ Արցախը նախագահ ունենա, այդ ինստիտուտը պահպանվի, երկրորդը՝ այն նախագահը, որը կընտրվի, պիտի կենսունակ լինի: Պիտի Արցախի նախագահը նաև լինի էնպիսին, որպեսզի այդ ժողովուրդը՝ Արցախի ժողովուրդը, վախվորած, չգիտեմ, խեղճացած, անհայրենիք էդ զգացողությունը չլինի իրենց մոտ, և կարողանա համախմբի իր շուրջ», – հայտարարեց արցախցի խորհրդարանականը:
Սամվել Շահրամանյանը ղեկավարել է Արցախի վերջին օրերին: Խորհրդարանը նրան ընտրեց Ադրբեջանի վերջին հարձակումից ու Արցախի հայաթափումից տասն օր առաջ: Արդյոք մտադիր է շարունակել որպես վտարանդի նախագահ: Շահրամանյանը մի քանի օր առաջ ասաց՝ քաղաքական ու հանրային քննարկումներից հետո կորոշի. – «Կախված է մեր քաղաքական ուժերի դիրքորոշումից, մեր հասարակության դիրքորոշումից, և մենք հաշվի ենք առնելու այդ բոլորի կարծիքները»:
Նախընտրական քննարկումներին, որ ակտիվ շարունակվում են, չեն մասնակցում Սամվել Բաբայանի գլխավորած կուսակցության՝ «Միասնական Հայրենիք» խմբակցության պատգամավորները: Նրանք ոչ մի հարցում միասնական չեն պատգամավորների հետ, պնդում է Հակոբյանը: Ինտրիգներ է նկատում, որ իրեն դուրս չեն գալիս: Մամուլում գրվեց նաև Սամվել Բաբայանի թեկնածության մասին, բայց Բաբայանը հայտարարեց, որ չի հավակնում Արցախի նախագահի պաշտոնին: Հետո լուրեր շրջանառվեցին Արցախի նախկին նախարարներից Հայկ Խանումյանի թեկնածության մասին:
«Որևէ խմբակցություն ինձ առաջարկ չի արել, որևէ պատգամավոր ինձ առաջարկ չի արել, ոչ էլ ես եմ որևէ մեկին առաջարկ արել: Արցախի տարածքից դուրս որևէ արցախյան պաշտոնի չեմ հավակնում: Երբ Արցախը վերադարձնենք, էն ժամանակ էդ հարցը կարող եք ուղղել», – «Ազատությանը» ասաց Խանումյանը:
Հայկ Խանումյանը, թեև առաջադրվելու մտադրություն չունի, բայց կողմ է, որ Արցախի կառավարությունը, թեկուզ վտարանդի, շարունակի գործել. – «Ես որևէ խնդիր դրա մեջ չեմ տեսնում և զարմացած եմ էն մարդկանց վրա, որոնք դրա մեջ խնդիր տեսնում են»:
