Իրանի դեմ ԱՄՆ պատժամիջոցները նպատակ ունեն խաթարել զարգացող երկրների հարաբերությունները, Թեհրանը կդիմադրի Վաշինգտոնի տնտեսական ճնշմանը։ Այս մասին հայտարարել է Իսլամական Հանրապետության արտաքին գործերի նախարարության պաշտոնական ներկայացուցիչ Էսմայիլ Բաղային։
«Իրանի ԱԳՆ պաշտոնական ներկայացուցիչը խստորեն դատապարտել է Իրանի և մի շարք այլ պետությունների ֆիզիկական և իրավաբանական անձանց դեմ ԱՄՆ նոր պատժամիջոցները՝ Իրանի հետ տնտեսական տարբեր ոլորտներում համագործակցության պատրվակով», - ասվում է դիվանագետի հաղորդագրության մեջ, որը հրապարակվել է հանրապետության ԱԳՆ Telegram ալիքում։
Նա նշել է, որ ԱՄՆ-ի վերջին սահմանափակող միջոցները ցույց են տալիս Վաշինգտոնի ցանկությունը «խաթարելու զարգացող երկրների միջև բարեկամական և օրինական հարաբերությունները տնտեսական ահաբեկչության միջոցով»:
Իրանի դեմ նոր պատժամիջոցների սահմանումը, ընդգծել է Բաղային, վկայում է «ամերիկյան իշխանությունների հակասական մոտեցման, դիվանագիտության հետապնդման հարցում բարի կամքի և լրջության բացակայության մասին»։
