Իսպանիայի վարչապետ Պեդրո Սանչեսը հայտարարել է, որ էլեկտրաէներգիայի վերականգնումը երկրում խոշոր հոսանքազրկումից հետո հնարավոր է դարձել Ֆրանսիայի և Մարոկկոյի աջակցության, ինչպես նաև գազի և հիդրոէլեկտրակայանների շահագործման շնորհիվ:
«Էներգամատակարարման վերականգնումը ձեռք է բերվել Ֆրանսիայի և Մարոկկոյի հետ կապերի, ինչպես նաև համակցված ցիկլով գազի և հիդրոէլեկտրակայանների միջոցով: Քաղաքացիները պետք է իմանան, որ ատոմակայանները, ընդհակառակը, խնդիր են դարձել, քանի որ դրանք դադարեցվել են անջատման պահին»,- ասել է Սանչեսը Նախարարների խորհրդի նիստից հետո կայացած մամուլի ասուլիսում։
Վարչապետը հայտարարել է վթարի պատճառները հետաքննող կառավարական հանձնաժողով ստեղծելու մասին և էներգահամակարգի օպերատորներից պահանջել է ապահովել ենթակառուցվածքների հուսալիությունը։
«Այն, ինչ եղել է, երբեք չպետք է կրկնվի»,- ընդգծել է նա։
Կառավարությունը մտադիր է նաև պատասխանատվության ենթարկել մասնավոր օպերատորներին, եթե նրանք մեղավոր ճանաչվեն:
