Թուրքիայի պաշտպանության նախարարությունը պաշտոնական հայտարարությամբ հերքել է մի շարք լրատվամիջոցներում տարածված այն տեղեկությունները, թե Անկարան Պակիստան է ուղարկել զենք-զինամթերքով բեռնված 6 ինքնաթիռ։
Նախարարության հայտարարության համաձայն՝ Թուրքիայից մեկնած միայն մեկ բեռնատար ինքնաթիռ է վայրէջք կատարել Պակիստանում, այն էլ՝ վառելիքի լիցքավորման նպատակով, որից հետո շարունակել է իր թռիչքը սահմանված երթուղով:Նշյալ տեղեկությունները շրջանառվեցին Հնդկաստանի և Պակիստանի միջև տասնամյակներ շարունակվող հակամարտության սրացումից հետո, երբ ապրիլի 22-ին Հնդկաստանի Փահալգամ զբոսաշրջային քաղաքում զինյալների հարձակման հետևանքով սպանվել էր 26 մարդ։ Զոհվածների մեծ մասը զբոսաշրջիկներ էին։
Հարձակման պատասխանատվությունը ստանձնել էր Պակիստանի կողմից աջակցվող Դիմադրության ճակատ (TRF) ապստամբական խմբավորումը, որը Հնդկաստանում համարվում է ահաբեկչական։ Իսլամաբադն էլ հերքում էր իր ներգրավվածությունը հարձակման մեջ։
Հիշեցնենք, որ վերջին շրջանում Թուրքիայի և Պակիստանի ռազմական համագործակցության խորացման մասին բազմատեսակ տեղեկություններ են շրջանառվում, սակայն երկու երկրների պաշտոնական աղբյուրները դրանց մեծ մասը հերքում են:
