Ֆինլանդիայի նախագահ Ալեքսանդր Ստյուբը խոստովանել է, որ Ուկրաինան ստիպված կլինի գնալ տարածքային զիջումների՝ «արտացոլելով իրավիճակը ռազմի դաշտում»։ Համապատասխան հայտարարությունը նա արել է The New York Times-ին տված հարցազրույցում։
«Նա խոստովանել է, որ Ուկրաինան պետք է փոխզիջումների գնա այն տարածքների շուրջ, որոնք կարտացոլեն մարտադաշտի իրողությունները»,- գրում է հրատարակությունը։
Միաժամանակ, Ստյուբը հայտարարել է, որ իր երկիրը չի ճանաչում նման տարածքները որպես ռուսական։ Նա պնդում է, որ ավելի վաղ ամերիկացի բանակցողները ուրվագծել էին խաղաղության ծրագրի նախագիծ, ըստ որի՝ ԱՄՆ-ը Ղրիմը կճանաչի որպես Ռուսաստանի մաս։
Հետո «Ուկրաինան ու եվրոպացիները հանդես եկան հակաառաջարկով, որը մերժվեց Մոսկվայի կողմից։ Ես առաջարկում եմ վերակառուցել այս երկու առաջարկներն այնպես, որ ստեղծվի գործարքի հասնելու հնարավորություն հենց հիմա»,- ասել է նա։
Քաղաքական գործիչը նաեւ կարծում է, որ Ուկրաինային անհրաժեշտ է «մինչև ատամները զինել»՝ որպես ապագա անվտանգության երաշխիքների մաս։
