Ռուսաստանի նախագահ Վլադիմիր Պուտինը Իրանի ԱԳ նախարար Աբբաս Արաղչիի միջոցով ուղերձ է հղել Իրանի գերագույն առաջնորդ Ալի Խամենեիին։ Այս մասին հայտնել է ՌԴ նախագահի մամուլի քարտուղար Դմիտրի Պեսկովը։
«Այո, իհարկե, նախագահի կողմից Իրանի գերագույն առաջնորդին լավագույն բարեմաղթանքներն ու բովանդակային ուղերձները փոխանցվել են նախարարի միջոցով»,- ասել է Պեսկովը։
Նախօրեին ՌԴ նախագահ Վլադիմիր Պուտինը Կրեմլում հանդիպել էր Իրանի արտգործնախարար Աբբաս Արաղչիի հետ։
Ապրիլի 17-ին Իրանի արտգործնախարարության ղեկավարը ժամանել է Մոսկվա, որտեղ նախատեսված են նրա բանակցությունները ռուս գործընկեր Սերգեյ Լավրովի հետ։ Նրա այցի հիմնական նպատակը, ինչպես հայտնել է ինքը՝ Արաղչին, Ռուսաստանի նախագահին հանրապետության գերագույն առաջնորդ Ալի Խամենեիի գրավոր ուղերձը փոխանցելն է։ Նա ասել է, որ այն «ընդգրկում է համաշխարհային վերջին կարևոր իրադարձությունները, իրադարձությունները տարածաշրջանում, ինչպես նաև երկկողմանի հարցեր»:
Թարգմանությունը՝ Մանուել Թամազյանի
