ԱՄՆ վարչակազմը հրաժարվել է երաշխավորել, որ ԱՄՆ պետքարտուղար Մարկո Ռուբիոն կմասնակցի ԵՄ-ի հետ Ուկրաինայի հարցով բանակցությունների նոր փուլին, որը նախատեսված է հաջորդ շաբաթ Մեծ Բրիտանիայի մայրաքաղաքում։Լրագրողների համար հերթական ճեպազրույցում, մեկնաբանելով եվրոպացիների այս ծրագրերը, ԱՄՆ Պետդեպարտամենտի մամուլի ծառայության ղեկավար Թեմմի Բրյուսը փաստացի խոստովանել է, որ Ռուբիոն կարող է չգնալ Լոնդոն։
«Ես լսել եմ այս հայտարարությունը ֆրանսիական կողմից՝ Լոնդոնում կայանալիք բանակցությունների մասին: Առայժմ չեմ կարող ասել, թե կոնկրետ որոնք են լինելու պետքարտուղարի գործողությունները», -ասել է դիվանագետը։
Միևնույն ժամանակ, նա մի քանի անգամ կրկնել է, որ Վաշինգտոնը մտադիր է «շաբաթների ընթացքում» իր համար որոշում կայացնել, թե արդյոք, իր կարծիքով, Ռուսաստանն ու Ուկրաինան պատրաստ են լուծել հակամարտությունը։
