Եվրամիության որոշ քաղաքական գործիչների՝ Ուկրաինայում խաղաղ բանակցությունները խաթարելու փորձերը ցնցող են և անընդունելի: Այս մասին հայտարարել է Հունգարիայի արտաքին գործերի և արտաքին տնտեսական կապերի նախարար Պետեր Սիյարտոն՝ Իսլամաբադում Պակիստանի փոխվարչապետ և արտաքին գործերի նախարար Իսհակ Դարի հետ հանդիպումից հետո կայացած մամուլի ասուլիսում։
Անդրադառնալով ուկրաինական հակամարտությանը՝ նա նշել է. «Ցնցող է, որ որոշ եվրոպացի քաղաքական գործիչներ փորձում են խաթարել Ուկրաինայում խաղաղ բանակցությունների հաջողությունը և որոշել են այնտեղ շարունակել պատերազմը»։
«Ուշագրավն այն է, որ ամբողջ աշխարհը, ներառյալ Ամերիկան, Ասիան և Աֆրիկան, կողմ են Եվրոպայում խաղաղության վերականգնմանը, մինչդեռ եվրոպացի քաղաքական գործիչները դրա դեմ քայլեր են ձեռնարկում։
Սա անընդունելի է, և այդ իսկ պատճառով մենք եվրոպացի քաղաքական գործիչներին կոչ ենք անում չխաթարել ԱՄՆ նախագահ Դոնալդ Թրամփի խաղաղության ջանքերը»,- ասել է Սիյարտոն M1 հեռուստատեսությամբ հեռարձակված մամուլի ասուլիսում։
Հունգարիայի արտգործնախարարը երկու երկրների միջև դիվանագիտական հարաբերությունների հաստատման 60-ամյակի կապակցությամբ այցելել է Պակիստան և Իսլամաբադում քննարկել տնտեսական և մշակութային համագործակցության հարցեր։
