Մոսկվայում ԴԻԱԼՈԳ մատենաշարում լույս է տեսել Գևորգ Մինասյանի և Անժելա Սիմոնյանի «Հաքան Ֆիդան․ ուրվագծեր Թուրքիայի ապագա հավանական նախագահի կերպարին» գիրքը։ Դրա հեղինակները փորձել են կռահել թուրքական հեռանկարային քաղաքական գործիչ Հաքան Ֆիդանի «անձի կոդը», որը մեծ հետաքրքրություն է ներկայացնում այնպիսի ոլորտներում, ինչպիսիք են միջազգային հարաբերությունները, դիվանագիտությունը և անվտանգությունը։ ԴԻԱԼՈԳ մատենաշարի հիմնադիրը և սույն գրքի հրատարակման մեկենասը հասարակական-քաղաքական գործիչ, քաղաքագետ Յուրի Նավոյանն է։
«Հաքան Ֆիդան․ ուրվագծեր Թուրքիայի ապագա հավանական նախագահի կերպարին» գիրքը բաց աղբյուրների հիման վրա շարադրանք է Թուրքիայի առաջատար հետախուզական ծառայության՝ MIT-ի նախկին ղեկավարի և այդ երկրի ներկայիս արտաքին գործերի նախարար Հաքան Ֆիդանի մասին։ Հրատարակությունը ներկայացնում է նրա կյանքի և մասնագիտական ուղին։ Իբրև հավելված գրքում ներկայացված է նաև Հաքան Ֆիդանի մագիստրոսական ատենախոսությունը, որը նվիրված է Մեծ Բիրտանիայի, ԱՄՆ-ի և Թուրքիայի հետախուզական համակարգերի համեմատական վերլուծությանը։ Գրքի համահեղինակ Գևորգ Մինասյանը Հայաստանի ԱԱԾ պահեստազորի գնդապետ է, 1996–2022 թթ. տարբեր օպերատիվ և ղեկավար պաշտոններ է զբաղեցրել այդ ծառայությունում։ Եղել է Հայաստանի Հանրապետության լիազոր ներկայացուցիչը ԱՊՀ Հակաահաբեկչական կենտրոնում։
Գրքի մյուս համահեղինակ Անժելա Սիմոնյանը թուրքագետ է, ԵՊՀ Արևելագիտության ֆակուլտետի շրջանավարտ։ Զբաղվում է Թուրքիայի ռազմա-արդյունաբերական համակարգի ուսումնասիրությամբ։ «Հաքան Ֆիդան․ ուրվագծեր Թուրքիայի ապագա հավանական նախագահի կերպարին» գրքի առաջաբանը գրել է գնդապետ, անվտանգության մարմինների վետերան, Թուրքիայի հարցերով փորձագետ Ալեքսանդր Պոլտավսկին։ Գրքում զետեղված են նաև ՌԴ Արտաքին հետախուզության ծառայության պաշտոնաթող գնդապետ, ՄԳԻՄՕ-ի պրոֆեսոր Անդրեյ Բեզրուկովի և քաղաքագիտության դոկտոր, պրոֆեսոր Ալեքսանդր Սվարանցի գրախոսականները։
Ապրիլի 21-ին ԴԻԱԼՈԳ կազմակերպությունը Մոսկվայում անց է կացնելու գրքի շնորհանդեսը հայկական և ռուսական գիտական, քաղաքագիտական և հասարակական շրջանակների մասնակցությամբ։
