Պակիստանի անվտանգության ուժերն ազատել են գրոհայինների կողմից առևանգված գնացքի առնվազն 155 ուղևորի և սպանել են մոտ 30 ծայրահեղականների։ Այս մասին հայտնում է Geo հեռուստաալիքը՝ հղում անելով իրավապահ մարմինների աղբյուրներին։
Անվտանգության ուժերը շարունակում են մնացած ուղեւորներին ազատելու գործողությունը, որոնք զինյալների հարձակման պահին կարող էին լինել 450 հոգի։
Հարձակմանը մասնակցած ծայրահեղականների ստույգ թիվը հայտնի չէ։ Հաղորդվում է նաև, որ ազատ արձակված 17 պատանդ հոսպիտալացվել է «անհետաձգելի բժշկական օգնության» համար։ Նրանց վնասվածքների բնույթը չի նշվում։
Հեռուստաալիքի տվյալներով՝ հարձակվողները գնացքը քշել են դեպի հեռավոր շրջան՝ Աֆղանստանի և Իրանի հետ սահմանների մոտ։ Պատանդներին ազատելու հատուկ գործողության մեկնարկից հետո զինյալները բաժանվել են փոքր խմբերի։
Հեռուստաալիքի իրավապահ մարմինների աղբյուրները պնդում են, որ ծայրահեղականներն օգտագործում են արբանյակային հեռախոսներ և կապ են պահպանում հարձակման ենթադրյալ կազմակերպիչների հետ, ովքեր գտնվում են Աֆղանստանում։ Գործողությունը բարդանում է նրանով, որ գրոհայինները պատանդներին օգտագործում են որպես կենդանի վահան, հաղորդում է հեռուստաալիքը։
