Նիկոլ Փաշինյանը միացրել է հին ձայնասկավառակը «նախկինների» ու «թալանը» «կոպեկ առ կոպեկ», «Բրաբուս առ Բրաբուս» հետ բերելու մասին: Պատճառը Հայաստանի երկրորդ քաղաքում՝ Գյումրիում մարտի 30-ին կայանալիք ՏԻՄ արտահերթ ընտրություններն են, որին ՔՊ-ն մասնակցում է քաղաքապետի պաշտոնակատար Սարիկ Մինասյանի գլխավորած ցուցակով: Ընդդիմությունը համոզված է, որ «Քաղաքացիական պայմանագրի» վարկանիշն այնքան ցածր է, որ իշխող կուսակցությունը ոչ մի շանս չունի հաղթելու, ուստի վարչապետը գործի է դրել իր ողջ ռեսուրսները՝ «մեր Սարիկի» շանսերը գոնե մի փոքր ավելացնելու համար: Կիրակի օրը՝ մարտի 9-ին, նախընտրական քարոզարշավը դեռ չսկսած՝ Փաշինյանը ՔՊ-ի ողջ կազմով գնացել էր Գյումրի միջոցառումների մասնակցելու և քաղաքական սուր ելույթներ ունենալու:
Հայտարարեց, թե ընդդիմությունը Գյումրիում դուրս է եկել վերջին ճակատամարտի: Մամուլը հիշեցնում է՝ Գյումրին Տղմուտ գետը չէ, որ անցնես ու գոռաս «ուռռա»:«Ժողովրդավարություն և անվտանգություն» ՀԿ նախագահ, քաղաքական գործիչ Նաիրա Զոհրաբյանը նույն օրը եղել է Գյումրիում և պարզապես ապշած է անվտանգության միջոցառումների և վարչական ռեսուրսների կիրառման այն ծավալից, որ գործի էր դրվել Գյումրիում վարչապետի ժամանման առթիվ: Ասում է՝ նույնիսկ Ստալինի, Բրեժնևի կամ Հյուսիսային Կորեայի առաջնորդ Կիմ Չեն Ընի համար այդքան ոստիկանական ներուժ դժվար թե կուտակեին:
Euromedia24-ի հետ զրույցում Զոհրաբյանն ընդգծեց՝ չի կարող մարդ խոսել ժողովրդավարությունից և իր բառապաշարում օգտագործել նման արտահայտություններ, որոնք նույնիսկ շուկշինյան «հարբած մուժիկի» կերպարի հետ համեմատելի չեն:
Նաիրա Զոհրաբյան. 01:17-02:24 «Դրան գումարենք իր ուղղակի անընդունելի լեքսիկոնը իր կուսակցության օպոնենտներին, որոնց ինքն անվանեց առնետ, որոնք դուրս են եկել, և առնետներին պետք է նորից մտցնել իրենց տեղը... Զարհուրելի է, երբ այս մարդը, երբ ընկնում է էքստազի մեջ, երբ կանգնում է հերթական ընտրական փուլի առջև, իր լեքսիկոնը, ես չգիտեմ, դա գավառական մուժիկի լեքսիկոն էլ չի, դա շուկշինյան լեքսիկոնով ասած՝ «հարբած մուժիկի» լեքսիկոն էլ չի:
Չի կարող մարդը խոսել ժողովրդավարությունից և իր լեքսիկոնում օգտագործել՝ «ինչ ուզենամ՝ թափ կտամ», «կուզենամ մատ թափ կտամ, կուզենամ՝ ուրիշ բան թափ կտամ», «կշինեմ»... Էլ չեմ խոսում՝ «ծեփել ասֆալտին», և այլն, և այլն»:
Ազգային ժողովի նախկին պատգամավորը խորհուրդ է տալիս Փաշինյանին, «թալանը» հետ բերելու մասին խոսելուց առաջ, բացել Արցախի այն քաղաքների, գյուղերի, սրբավայրերի, հարյուրավոր եկեղեցիների, հազարավոր մշակութային կոթողների ցանկը, որ ինքն անձամբ իր ստորագրությամբ հանձնել է Ադրբեջանին:Ինչ վերաբերում է Գյումրիի ընտրություններին՝ Նաիրա Զոհրաբյանը վստահ է, որ եթե իշխանությունները չգնան ընտրակեղծիքների՝ ՔՊ-ն չի կարող հաղթել Գյումրիում:
Նաիրա Զոհրաբյան. 05:55-07:16.
«Ես վստահ եմ, որ եթե իրենք չգնան ընտրակեղծիքի, չգնան վարչական ռեսուրսի կիրառման, իսկ արդեն իսկ ես առավոտյան արդեն ասացի, որ տեղեկություն կա, որ բոլոր իշխանությունների համար ծառայած Սովռանոյի Արման անունով անձնավորությունը… Ես ամենայն պատասխանատվությամբ ասում եմ՝ առանց տոտալ ընտրակեղծիքների, առանց ընտրակաշառքի… Չքվեարկել, բոլոր ծրագրերը սոցիալական աջակցության իրականացնել մարտի 30-ից հետո»:
Նշենք, որ մարտի 30-ին Գյումրիում կայանալիք ՏԻՄ արտահերթ ընտրություններին մասնակցելու համար հայտ է ներկայացրել 9 քաղաքական ուժ՝ 6 կուսակցություն և 3 դաշինք: Դրանք են՝ Կոմունիստական կուսակցությունը, «Իմ հզոր համայնք» կուսակցությունը, «Հայաստանի աշխատավորական սոցիալիստական» կուսակցությունը, «Ապրելու երկիր» կուսակցությունը, «Մեր քաղաքը» դաշինքը, «Դեմոկրատական այլընտրանք» կուսակցությունը, «Քաղաքացիական պայմանագիր» կուսակցությունը, «Մայր Հայաստան» դաշինքը և «Եվրոդաշինքը»:
Արամ Սարգսյան
Արարատ Գրիգորյան
Euromedia24
