Վանաձորի նախկին քաղաքապետ Մամիկոն Ասլանյանը դեմ չէ ընդդիմության ներսում հանրապետականների և քոչարյանականների միջև տարանջատմանը, բայց ըստ նրա՝ եթե մեղադրանքներ են հնչեցվում միմյանց հասցեին, ապա այդ մեղադրանքները պետք է ունենան ուղղվածություն՝ քրեական, բարոյական, քաղաքական կամ պատմական: Այս մասին նա նշեց լրագրողների հետ զրույցում՝ ՀՀԿ փոխնախագահ Արմեն Աշոտյանի դատական նիստից առաջ:
Այդ համատեքստում նախկին քաղաքապետն անդրադարձավ այս օրերին մամուլում ակտիվորեն քննարկվող հարցին՝ ո՞վ է բերել Փաշինյանին իշխանության:
«Վանաձորի քաղաքապետի պատուհանից ամենալավը դա է երևացել, թե ով է բերել Նիկոլ Փաշինյանին իշխանության: Ես գուցե մի օր դրա մասին կխոսեմ: Դա որևէ մեկի համար, ինձ թվում է, գաղտնիք չէ», - պատասխանեց Մամիկոն Ասլանյանը՝ նշելով, որ նկատի չունի անձերի:
Ասլանյանի խոսքով՝ հանրային քննարկումները «Ո՞վ բերեց Նիկոլին» կամ «Սերժ Սարգսյանը հանձնեց նրան իշխանությունը, թե չհանձնեց» հարցերից պետք է տեղափոխվի այլ դաշտ:
«Ովքեր որ հիմա թիրախավորում ու քննադատում են, ասում են՝ Սերժ Սարգսյանն ընդհանրապես պիտի իշխանությունը չհանձներ, այսինքն՝ պիտի ամեն գնով պետականության համար պիտի պահեր, եթե այդպես է, ապա այսօրվա քննադատողների մեծ մասը պիտի այդ հարցը չբարձրացնեին», - հավելեց ՀՀԿ-ական նախկին քաղաքապետը:
Մանրամասները՝ տեսանյութում
Արամ Սարգսյան
