Պակիստանցի իրավապաշտպան Սայիդա Ղուլամ Ֆաթիման պատրաստվում է մեկնել Բաքու՝ մասնակցելու Արցախի նախկին պետնախարար Ռուբեն Վարդանյանի դեմ շինծու մեղադրանքների հիման վրա ընթացող դատավարությանը։ NEWS.am-ին տված հարցազրույցում Ֆաթիման հույս է հայտնել, որ իրեն թույլ կտան մասնակցել նիստին։
«Քանի որ պակիստանցիներն ազատ կարող են գնալ Ադրբեջան, ես որոշեցի մեկնել Բաքու և տեսնել, թե ինչ իրավիճակ է այնտեղ, ինչ է կատարվում Ռուբենի հետ, ինչ պայմաններում է նա պահվում և ինչ դատավարություն է ընթանում նրա դեմ»,- ասաց նա։ Ֆաթիման, որը 2016թ-ին եղել է հայ գործարար և բարերար Ռուբեն Վարդանյանի կողմից հիմնադրված «Ավրորա» մարդասիրական մրցանակի հավակնորդներից մեկը, կոչ է անում իրավապաշտպաններին ու բոլոր մտահոգ մարդկանց պայքարել Վարդանյանի ազատության համար։ «Մինչ ձերբակալվելը մի քանի անգամ հանդիպել եմ Ռուբեն Վարդանյանի հետ։
Նա հրաշալի մարդ է և անմեղ է։ Մենք ապրում ենք անարդար աշխարհում՝ արդարության հասնելը բավական դժվար է, բայց պետք է փորձել, պետք է պայքարել նրա ազատության համար։ Նա չպետք է տառապի։ Բոլոր իրավապաշտպանները պետք է իրենց ձայնը բարձրացնեն և պայքարեն նրա ազատության համար։ Պետք է փորձենք, չպետք է մենակ թողնենք նրան։ Ռուբենը շատ լավ մարդ է, հումանիստ է, պայքարել է հանուն մարդու իրավունքների և խաղաղության, ուստի չպետք է լինի այս վիճակում»,- եզրափակեց Ֆաթիման։
