Իսրայելի միտումը՝ յուրաքանչյուր մահմեդական երկիր դիտելու որպես սպառնալիք, չափազանց վտանգավոր է։ Նման կարծիք է հայտնել Թուրքիայի արտգործնախարար Հաքան Ֆիդանը` մեկնաբանելով 2024 թվականի վերջին իսրայելական զորքերի ներխուժումը Սիրիայի տարածք։
«Սիրիայի տարածքի վրա շարունակվող հարձակումները և զորքերի հետագա տեղաշարժը ակնհայտ սադրանք են: Իսրայելը յուրաքանչյուր արաբական և մահմեդական երկիր դիտարկում է որպես սպառնալիք, սա չափազանց վտանգավոր է: Հարևաններին թուլացնելու ռազմավարությունն անընդունելի է», - ասել է նա բրիտանական Financial Times թերթին տված հարցազրույցում:
2024 թվականի նոյեմբերի վերջին զինված ընդդիմադիր խմբավորումները լայնածավալ հարձակում են սկսել սիրիական բանակի դիրքերի դեմ։ Դեկտեմբերի 8-ին նրանք մտան Դամասկոս, Բաշար ալ-Ասադը հրաժարական տվեց նախագահի պաշտոնից ու լքեց երկիրը։
Նույն օրը իսրայելական բանակը հայտարարեց, որ դիրքեր է գրավել Գոլանի բարձունքների բուֆերային գոտում, որը 1974 թվականից առանձնացրել է Իսրայելի և Սիրիայի վերահսկողության տակ գտնվող տարածքները։ Ի թիվս այլ բաների, իսրայելցի զինվորականները գրավել են Հերմոն լեռնաշղթայի արեւելյան կողմը, որը նախկինում վերահսկվում էր սիրիական բանակի կողմից։
