ՀՀ երրորդ նախագահ ՍԵրժ Սարգսյանի նախկին խոսնակ Սամվել Ֆարմանյանը, որպես մոլի ֆուտբոլասեր, այսօր էլ ակտիվ հետևում է մեր ազգային հավաքականի խաղերին, այդ թվում հայկական ֆուտբոլի, ՀՖՖ-ի շուրջ սկանդալային բոլոր զարգացումներին և խիստ մտահոգված է հայկական ֆուտբոլի ճակատագրով, ամբողջովին կիսում է ՖԱՖ-ի տեսակետը և սպասում է ՀՖՖ նախագահի հրաժարականին՝ ժամ շուտ՝ ֆուտբոլային տնտեսությունը գիտակցված քամուն տալու համար։
Euromedia24-ը զրուցել է հասարակական-քաղաքական գործիչ Սամվել Ֆարմանյանի հետ։
«Շատ մեծ ցավ եմ ապրում հայկական ֆուտբոլում ստեղծված այս աղետալի վիճակի համար: Ցավոք, այն ինձ համար սպասված էր, նոր բան չկա: Այս վիճակը վաղուց է, չէ՞:
ՀՖՖ-ն Նիկոլի իշխանության ճշգրիտ հայելին է. անպատիվ, անթասիբ, պարտության մեջ շահագրգիռ, ստախոս, ձախողակ, բարոյական որևէ արգելք չունեցող ու ոչ մի բանի առաջ կանգ չառնող, իրենք իրենց արած ապօրինություններից ու գրանցած խայտառակ արդյունքներից վախեցած, այդ վախից սեփական աթոռին էլ ավելի կառչած:
Դրանով հանդերձ մատաղացու ուլի դեմքով՝ ոտքից գլուխ կոռուպցիայի ու հովանավորչության մեջ թաղված:Կասկած չունեմ, որ մի օր այնպիսի հյութեղ բացահայտումներ են լինելու ֆեդերացիայի ղեկավարության կոռուպցիոն գործունեության հետ կապված՝ սկսած իսպանացի մարզչական շտաբի, այսպես կոչված, «աշխատավարձերից» մինչև ՈՒԵՖԱ-ից ու ՖԻՖԱ-ից ստացված հսկայական միջոցների վատնում ու պետբյուջեից արված միլիարդավոր դրամի հատկացումների մսխում, որ անգամ ամենատեղեկացվածներն են իրենց սխալված զգալու:
Բայց, հանուն ճշմարտության Արմեն Մելիքբեկյանը երկաթե փաստարկ ունի. Նիկոլը մի ողջ երկրի ու ժողովրդի ճակատագիր վարի տալուց հետո չի հեռացել իր աթոռից, ուրեմն ինքն ինչու՞ պիտի հեռանա ընդամենը Նիկոլի գործը շարունակելու ու ֆուտբոլային տնտեսությունը գիտակցված քամուն տալու համար:
Իր ընկալմամբ հակառակը՝ պիտի պարգևատրեն իրեն վստահված ոլորտը բարեհաջող քանդելու համար:Ամեն ինչ, սակայն օրինաչափ է: Մի իշխանություն, որի գոյության առաջնային բանաձևը ժողովրդի մի հատվածին մյուսի դեմ հանելն ու բոլորին սևացնելն է, նրան թերարժեքության բարդույթ սրսկելը, ինչպե՞ս կարող է շահագրգիռ լինել հայրենական ֆուտբոլի զարգացմամբ:
Ահնար է: Չէ՞, որ ֆուտբոլը մեծագույն պոտենցիալ ունի՝ համախմբելու ժողովրդին, բարձրացնելու ժողովրդի զանգվածային ինքնագնահատականը, լավատեսություն ու դրական աուրա սփռելու երկրում և սփյուռքում:
Կարծում եք, դա Նիկոլի շահերից բխու՞մ էր: Ոչ:Մելիքբեկյանն ու մյուսները ֆուտբոլային ասեղի վրա դրված Նիկոլի անկուշտ ստվերներն են․․․ Ընդամենը․․․ Նիկոլի իշխանության նման ոստիկանության հույսին մնացած կոռուպցիոներ հանցագործներ․․․ Ընդամենը:
Ֆեդերացիայի ղեկավարությունը պիտի հեռացած լիներ շատ վաղուց:Չհեռանան հիմա, կհեռանան Նիկոլի հետ ձեռք-ձեռքի տված, ու դա իրենց համար կլինի շատ ավելի ցավոտ»։
Հիշեցնենք՝ Մարտի 1-ին Երեւանում «Փյունիկ»-«Արարատ-Արմենիա» խաղից առաջ հերթական անգամ երկրպագուները հանկարծակի մտել էին խաղադաշտ` ՀՖՖ նախագահի հրաժարականի պահանջով բողոքի իրականացնելու, սակայն նախապես ֆուտբոլադաշտ բերված ոստիկանական ուժով եւ բռնություններով, ոչ իրավաչափ ուժի կիրառմամբ ֆուտբոլասերների բողոքի ակցիայից բերման ենթարկվեցին մեծ թվով ֆուտբոլասերներ , ձերբակալված է 9 քաղաքացի։
Մինչ այդ էլ 2024 սեպտեմբերից Փյունիկ ֆուտբոլային ակումբը մարզչի, ու ակումբի սեփականատիրոջ դեմքով պահանջեց ՀՖՖ նախագահ Արմեն Մելիքբեկյանի հրաժարականը ու հաջորդաբար ֆուտբոլային մի շարք ակումբներ հայտարարությւոն տարածեցին՝ նույն պահանջով, բայց Մելիքբեկյանն անդրդվելիորեն շարունակում է պաշտոնավարել՝ չնայած իր գործունեության վերաբերյալ մի շարք աղմկահարույց բացահայտումերին։
Սյուզի Բադոյան
