Հանրային գործիչ, պետական կառավարման մասնագետ Հովհաննես Ավետիսյանը գրում է․
«Այսօր կառավարությունը որոշում է ընդունել, որով «Լիդիան»ընկերության կողմից Հայաստանի մասնավոր բանկերից մինչև 5 տարի ժամկետով վարկեր վերցնելու համար տալիս է 150 միլիոն դոլարի բյուջետային երաշխիք: Սա Ամուլսարը հանքավայր սարքելու և շահագործում սկսելու համար:
Ծրագրի ռիսկերի մասին շատ ենք խոսել. Ծրագրով առաջացող խնդիրներին զուգահեռ հիմա էլ 150 միլիոն դոլարի երաշխիքն է գումարվում, որը միանգամից Հայաստանի պետական պարտքը այս չափով կավելացնի: Այսինքն այս ծրագրի առկա ռիսկերին մի հատ էլ գումարվում է, որ դրա ֆինանսական հետևանքների կրողն էլ ենք մենք լինելու:
Ստորև կարդացեք, թե այս երաշխիքը ինչ վիճակում գտնվող ընկերությանն են տալիս:
Մեջբերում կառավարության որոշումը հիմնավորող փաստաթղթերից:
«Համաձայն BDO հաշվետվության՝ Ընկերության բաժնետոմսերը (ներկայումս Ընկերության բաժնետոմսերի 87.5 տոկոսը) և Ընկերության թույլտվությունը գրավադրված են 2015թ․ նոյեմբերի 30-ին կնքված վարկային պայմանագրի դիմաց (hամաձայն 2015թ․ դեկտեմբերի 3-ին «Orion»-ի, «Osisko»-ի, «R.C.F»-ի (միասին՝ «Գրավառուներ») և «Լիդիան Ռեսորսիզ Արմենիա Լիմիթեդ»-ի («Գրավատու») միջև կնքված «Բաժնետոմսերի գրավի պայմանագիր» պայմանագրի և 2015թ. դեկտեմբերի 22-ին Գրավառուների և Ընկերության միջև կնքված «Ընդերքօգտագործման իրավունքների գրավի պայմանագիր» պայմանագրի), գրավադրված է նաև Ընկերությանը պատկանող անշարժ և շարժական գույքը, գրավադրված են նաև Ընկերության իրացման ենթակա բոլոր մետաղական նյութերը՝ ցանկացած ձևով կամ վիճակում, որոնք հանքաարդյունահանվել, արտադրվել, հանվել կամ այլ կերպ վերականգնվել են Ընկերության «Ամուլսար» նախագծի շրջանակներում, ներառյալ` հանքանյութը կամ ցանկացած այլ արտադրանք, որը ստացվել է դրա հետագա մանրացման, մշակման կամ հարստացման արդյունքում, ներառյալ չմշակված և մաքրված ոսկին, որը սեփականության իրավունքով պատկանում է Ընկերությանը»»։
