Սրբազան պայքարի առաջնորդ Բագրատ արքեպիսկոպոս Գալստանյանը հանդես է գալիս Ադրբեջանի բանտերում ապօրինաբար պահվող Արցախի ռազմաքաղաքական ղեկավարության և հատկապես Ռուբեն Վարդանյանի խնդիրներին վերաբերող հատուկ ուղերձով։
«Երեկվանից մեր հասարակությունը տագնապած, ամոթի և անպատվության վիճակում է՝ ականատես լինելով մեր շատ սիրելի Ռուբեն Վարդանյանի խոշտանգված նկարներին։ Հանձին Ռուբեն Վարդանյանի և պատանդառված Արցախի մյուս ռազմաքաղաքաղաքական ղեկավարության հայտնվել ենք այսպիսի վիճակում»,- ասաց Բագրատ Սրբազանը։
Նա նշեց, որ Ռուբեն Վարդանյանին ճանաչում է 2004թ․-ից և մտերիմ է եղել։ Վերջին հանդիպումը տեղի է ունեցել 2022թ․-ի հոկտեմբերին՝ Արցախում, երբ դեռ պետնախարար չէր նշանակվել։
«Մեր վերջին խոսակցությունը տեղի է ունեցել 2023թ․-ի սեպտեմբերի 19-20-ին, երբ ադրբեջանական ուժերի կողմից հարձակում տեղի ունեցավ Արցախի վրա, որից հետո Արցախը հայաթափվեց, ձերբակալվեց Ռուբեն Վարդանյանն ու Արցախի ռազմաքաղաքական ղեկավարությունը։ Մենք հավաքական իմաստով այսօր գտնվում ենք Բաքվի բանտերում։ Մենք կրում ենք այդ ամոթը, քանի որ մեր ռազմաքաղաքական ղեկավարությունը գտնվում է այնտեղ։ Մեզ հասնում էր կցկտուր տեղեկություններ, որ նրանք ենթարկվում են աննախադեպ կտտանքների։ Ռուբեն Վարդանյանի երեկվա պատկերները դրա ցայտուն ապացույցն է»,- իր խոսքում նշեց Սրբազանը՝ հավելելով․ «Ցավոք, Ռուբենը դավաճանվեց թե՛ ներսից, թե՛ դրսից։ Այսօր Ռուբենի և մյուս ռազմաքաղաքական ղեկավարների Բաքվի բանտերում գտնվելը Հայաստանի իշխանությունների և նրա ղեկավարի ուրացման պատճառով են այնտեղ»։
Ավելի մանրամասն՝ տեսանյութում։
