Ազգերի լիգայի փլեյ-օֆֆում Վրաստանի հավաքականը կհանդիպի Հայաստանի հավաքականի հետ: Առաջին խաղը կանցկացվի մարտի 20-ին Երևանում։ Իսկ մարտի 23-ին Վրաստանի ազգային հավաքականը իր մրցակցին կհյուրընկալի «Դինամո Արենայում»:
1tv.ge-ն գրում է, որ Վրաստանի Ֆուտբոլի ֆեդերացիայի մամուլի ծառայության հաղորդմամբ, «Դինամո Արենայում» կայանալիք հանդիպման տոմսերի վաճառքը կսկսվի փետրվարի 27-ին՝ ժամը 12:00-ին
Տոմսերի արժեքը կկազմի 20, 40, 70 և 100 լարի, իսկ յուրաքանչյուրը կարող է ձեռք բերել առավելագույնը չորս տոմս։ Անվտանգության միջոցառումներից ելնելով՝ վրացի երկրպագուներին թույլ չեն տա այցելել հյուրեր երկրպագուների համար նախատեսված առաջին կարգի 9-րդ և 10-րդ սեկտորները։
Մարտի 20-ին Երևանում կայանալիք հանդիպման տոմսերը վրացի երկրպագուների համար կվաճառվեն փետրվարի 28-ին՝ ժամը 12:00-ին։ Հանդիպումը կկայանա Երևանի Վազգեն Սարգսյանի անվան մարզադաշտում, որը տեղավորում է 14000 հանդիսական։ Տոմսի արժեքը 10 լարի է, և յուրաքանչյուրը կարող է ձեռք բերել առավելագույնը երկու տոմս։
Երկու հանդիպումների տոմսերը վաճառվելու են միայն առցանց և վաճառվելու են TKT.GE-ի կողմից:
