Այս ձերբակալության դեպքը նույն ձեռագրով արդեն չորրորդն է, նույն ավտոմեքենայում գտնվող նույն անձանց արդեն չորրորդ անգամ կասկածում են ապօրինի զենք կրելու մեջ։ Այս մասին ֆեյսբուքյան էջում ուղիղ եթերում հայտարարել է փաստաբան Արսեն Բաբայանը՝ անդրադառնալով այսօր իրեն ու ընկերներին ոստիկանություն բերման ենթարկելուն:
«ՆԳՆ քրեական ոստիկանությունը որոշել է ընդդեմ օրենքի գործողություններ կատարել։ Ինչո՞ւ եմ շեշտում հատուկ ՆԳՆ, քանի որ այդ իրադարձությունները տեղի են ունեցել նոր նախարար նշանակվելուց հետո: Դուք առիթ եք ունենալու տեսնելու շատ ծիծաղելի ու զավեշտալի իրադարձություններ։ Այս ձերբակալությունն ունի նախաբան, կեսօրից սկսած ոստիկանությունը «Հայրենիք» կուսակցության շենքի դիմաց տեղակայել էր, այսպես ասած, պոստեր։ 7-րդ վարչության, քրեական ոստիկանության միջոցով իրականացնում էր մեզ հետևելու գործընթաց։ Մենք դա ֆիքսել էինք, նրանց շարժը հսկում էինք, տեսնում էինք, առնվազն ես գիտեի, որ պետք է իրականացնեին այն ձերբակալությունը, որն իրականացրեցին։ Ես այն մեքենայում էի, որը տեղափոխեցին ոստիկանության բաժին, որը ոստիկանությունը ներկայացրել էր իր աղբյուրներով։ Հենց այդ պատճառով էի այդ մեքենայում, քանի որ գիտեի, որ այդ մեքենան պետք է տեղափոխեն, դրա մեջ եղած անձանց ձերբակալեն, ոստիկանությանն անակնկալի բերեցինք, երբ նրանք տեսան, որ ես էլ եմ գտնվում այդ մեքենայում»,- նշեց Բաբայանը։
Նրա խոսքով՝ ձերբակալության ողջ պրոցեսը՝ ոստիկանների հետևելուց, նրանց նկարահանելուց մինչև ձերբակալումն իրենք նկարահանել են, վաղը կհրապարակվի շատ հետաքրքիր ու զավեշտալի տեսաֆիլմ, որը ցույց կտա ոստիկանության ապաշնորհությունը, մասնագիտական կարողությունների բացակայությունը, նրանց գործողություններն իրենց կողմից ամբողջությամբ կանխատեսելը։
Ավելի վաղ Արսեն Բաբայանը հայտարարել էր, որ իրեն ու ընկերներին քրեական ոստիկանությունը ձերբակալել է ու տեղափոխում է ոստիկանություն՝ ապօրինի զենք-զինամթերք պահելու կասկածանքով։ Փաստաբանն ազատ է արձակվել, իսկ նրա հետ եղած երկու անձինք ձերբակալվել են։
