ԴԻԱԼՈԳ մատենաշարը (հիմնադիր՝ հասարակական-քաղաքական գործիչ, քաղաքագետ Յուրի Նավոյան) շարունակում է ընթերցողներին ուրախացնել նոր ու բացառիկ հրատարակություններով։ Մոսկվայում մատենաշարի շրջանակում լույս է տեսել գրող, լրագրող և հասարակական գործիչ Վիկտոր Կոնոպլյովի «Հայկական երկինքը» ժողովածուն։
Գրքի հրատարակությունն իրականացվել է մեցենատ Գոռ Կարախանյանի աջակցությամբ։ Վիկտոր Կոնոպլյովի «Հայկական երկինքը» գրքում զետեղված են հեղինակի կողմից տարբեր տարիներին գրված բանաստեղծություններ և հրապարակախոսական հոդվածների ընտրանի։ Կոնոպլյովի ուշադրության կենտրոնում հայերն են՝ իրենց ինքնատիպ պատմական և մշակութային միջավայրով, լի կյանքի շրջադարձերով։
Հեղինակը, որը բազմաթիվ անգամներ եղել է Հայաստանում և Արցախում, գրում է իր զգացմունքների մասին, որոնք առաջացել են հայկական հողեր այցելելուց, հյուրասեր ու իմաստուն մարդկանց հետ հանդիպելուց, հայկական հնագույն մշակույթի հետ ծանոթանալուց հետո։ Իր ստեղծագործությամբ Վիկտոր Կոնոպլյովը դիմում է նրանց, ովքեր դեռևս ծանոթ չեն հայկական ինքնատիպ աշխարհի հետ, որ հայացք նետեն նրան, իրենց համար բացահայտեն նրա աղբյուրների թարմությունն ու գաղտնիքը։
Հեղինակը համարում է, որ աշխարհում ոչինչ չի խաթարի հայ և ռուս ժողովուրդների բարեկամությունը։ Միայն միասնությամբ մենք խաղաղության և բարգավաճման կհասնենք։ Միանգամայն բնական է, որ Վիկտոր Կոնոպլյովի «Հայկական երկինքը» գրքի առաջաբանը գրել է արցախյան գրող, լրագրող և հրապարակախոս Աշոտ Բեգլարյանը։
