Ճապոնիայի վարչապետ Ֆումիո Կիսիդան և Հարավային Կորեայի նախագահ Յուն Սոկ Յոլը պայմանավորվել են խորացնել համագործակցությունը ՆԱՏՕ-ի հետ, իսկ Ռուսաստանի և Հյուսիսային Կորեայի հարաբերություններն անվանել են «լուրջ սպառնալիք»։ «Արմենպրես»-ի փոխանցմամբ՝ այս մասին հաղորդում է Kyodo գործակալությունը։Վաշինգտոնում տեղի ունեցած երկկողմ բանակցությունների ընթացքում երկու ղեկավարները հաստատել են, որ կամրապնդեն համագործակցությունն ԱՄՆ-ի, ՆԱՏՕ-ի և Հնդկախաղաղօվկիանոսյան տարածաշրջանի գործընկերների հետ՝ հաշվի առնելով, որ «տարածաշրջանային խնդիրները դառնում են ավելի բարդ և ավելի խորը հետևանքներ են ունենում», հայտնել են ճապոնացի պաշտոնյաները։ Կիսիդան և Յուն Սոկ Յոլը նաև նշել են, որ Փհենյանի և Մոսկվայի հարաբերությունների խորացումը լուրջ սպառնալիք են։ Ըստ Հարավային Կորեայի ղեկավարի՝ Հյուսիսային Կորեայի ռազմական և տնտեսական համագործակցության ամրապնդումը Ռուսաստանի հետ «լուրջ մտահոգություն է առաջացնում համաշխարհային անվտանգության, առավել ևս՝ Արևելյան Ասիայի համար»։ ՌԴ նախագահի՝ Հյուսիսային Կորեա այցի ընթացքում կողմերը ստորագրել են համաձայնագիր, որի դրույթներից մեկի համաձայն՝ երկրներից մեկի վրա հարձակման դեպքում մյուս կողմը պետք է օգնություն ցուցաբերի։ ՆԱՏՕ-ի հիմնադրման 75-ամյակին նվիրված գագաթնաժողովը տեղի է ունենում Վաշինգտոնում հուլիսի 9-ից 11-ը։ Եռօրյա գագաթնաժողովին մասնակցում են դաշինքի բոլոր 32 անդամ երկրների պատվիրակությունները, ինչպես նաև Ավստրալիան, Ճապոնիան, Նոր Զելանդիան, Հարավային Կորեան և Ուկրաինան։
Ճապոնիան և Հարավային Կորեան պայմանավորվել են խորացնել համագործակցությունը ՆԱՏՕ-ի հետ
11.07 12:05 |
Կատեգորիա
Համաշխարհային
