Մոսկվայի «Լոկոմոտիվը» պատրաստ է 6-ից 7 միլիոն եվրոյի դիմաց «Սևիլյա» թողնել Հայաստանի հավաքականի պաշտպան Նաիր Թիկնիզյանին։ Այս մասին հայտնում է Metaratings-ը։
Մայրաքաղաքային ակումբը մտադիր չէ զիջել խաղացողի տրանսֆերի գնի հարցում։ Իսպանական ակումբը ցանկանում է Թիկնիզյանի տրանսֆերը գնել ձմեռային տրանսֆերային պատուհանի ժամանակ, բայց ոչ «Լոկոմոտիվի» պայմաններով։
Իսպանական Լա Լիգան յուրաքանչյուր ակումբի համար սահմանում է ծախսերի սահմանափակում՝ հիմնվելով նրա ֆինանսական հաշվետվությունների վրա: 2024/25 մրցաշրջանի ընթացքում անդալուզյան ակումբը կարող է նոր խաղացողների համար ծախսել ոչ ավելի, քան 2,5 միլիոն եվրո։ Այս պարագայում Հայաստանի հավաքականի պաշտպանի տեղափոխությունը մոսկովյան ակումբից «Սևիլյա» գրեթե անհավանական է դառնում:
Նշվում է, որ «Սևիլյան» առաջին անգամը չէ, որ փորձել է պայմանագիր կնքել Նաիրի հետ: Ամառային տրանսֆերային պատուհանի ժամանակ իսպանացիները «Լոկոմոտիվին» անվճար վարձակալության տարբերակ են առաջարկել, ինչից մոսկովյան ակումբը հրաժարվել է:Ընթացիկ մրցաշրջանում՝ 25-ամյա խաղացողը մասնակցել է 23 հանդիպման՝ դառնալով 2 գոլի և 3 գոլային փոխանցման հեղինակ։
