Այսօր կառավարության նիստի ժամանակ ՏԿԵ նախարար Դավիթ Խուդաթյանը նշեց, որ առաջարկվում է վաղաժամկետ դադարեցնել Շիրակի մարզի Գյումրու ավագանու լիազորությունները և նշանակել ավագանու արտահերթ ընտրություններ։
ՏԿԵ նախարարը չբացառեց, որ Փարաքարում էլ կարող է փրայմերիզի մոդելը կիրառվի։
«Այո՛, փրայմերիզը Գյումրիում հաջողվել է, և «Քաղաքացիական պայմանագիր» կուսակցությունն այդ մոդելը համայնքների զգալի մասում համարում է կիրառելի»,-ասաց Խուդաթյանը։ Նիկոլ Փաշինյանն էլ հիշեցրեց, թե ինչ իրավիճակ էր ստեղծվել Գյումրիում.
«Ավագանու ամբողջ անդամները մանդատները վայր դրեցին, քաղաքապետը, տեղակալները՝ բոլորը հրաժարական տվեցին և այս իրադրությունից այլ ելք, քան արտահերթ ընտրությունների գնալը, չկա։ Կամ եթե կա, դա տեսականորեն ընդունելի չէ, քանի որ կարծում ենք, որ գյումրեցիները պետք է հնարավորություն ունենան ընտրելու իրենց ավագանուն։
Մենք ընդամենը իրավական ընթացակարգերն ենք ապահովում»։ Վարչապետը նշեց, որ առաջին անգամ Գյումրիում իրականացվել է նախնական քվեարկություն, որը միջազգային տերմինաբանությամբ հայտնի է փրայմերիզ անունով. «Առաջին փորձը կարևոր և հաջողված էր։
Կառավարող կուսակցությունում կա ըմբռնում, որ հետագայում բոլոր այն դեպքերում, որտեղ չունենք գործող համայնքի ղեկավար, այս մեխանիզմով մեր թեկնածուին կընտրենք, ինչը ժողովրդավարական ևս մեկ կարևոր ինստիտուտ է, որը ներդնում ենք ՀՀ-ում։
Օրենքների այս փաթեթներով նաև հնարավորություն է ստեղծվում Գյումրու քաղաքապետի պաշտոնակատար նշանակել վարչապետի կողմից։
Վաղը ես այդ նախնական քվեարկության արդյունքներով կկատարեմ այդ նշանակումը»։
