Վրաստանի ՆԳՆ աշխատակիցները Թբիլիսիում ցույցի ժամանակ ոստիկանների վրա հարձակվելու և խմբակային բռնություններին մասնակցելու մեղադրանքով ձերբակալել են երեք անձի։ Այս մասին հայտնում է գերատեսչության մամուլի ծառայությունը։
Ըստ ՆԳՆ-ի՝ մեղադրյալներից մեկը Թբիլիսիում Ռուսթավելի պողոտայում ցույցի ժամանակ համակարգված և շարունակաբար, այլ ցուցարարների հետ, ֆիզիկապես առերեսվել է ոստիկանների հետ, կիրառել պիրոտեխնիկա՝ ուղղված իրավապահների վրա։ Մեկ այլ մեղադրյալ այս տարվա դեկտեմբերի 1-ին հանրահավաքի ժամանակ Մոլոտովի կոկտեյլ էր նետել ոստիկանի վրա։
Երրորդ ամբաստանյալը դեկտեմբերի 4-ին Ազատության հրապարակում հարձակվել է իրավապահի վրա եւ մահակով հարվածել նրա գլխին։
Երեք մեղադրյալներին սպառնում է մինչև ինը տարվա ազատազրկում։ Ընդհանուր առմամբ, ըստ ՆԳՆ-ի, հանրահավաքներում տեղի ունեցած անկարգությունների հետ կապված տարբեր քրեական մեղադրանքներով բերման է ենթարկվել 18 մարդ։
