Իրաքի վարչապետ Մուհամեդ ալ-Սուդանին Բաղդադում ընդունել է ՌԴ փոխվարչապետ Ալեքսանդր Նովակի գլխավորած ռուսական պատվիրակությանը։ Այս մասին հայտնում է Իրաքի նախարարների կաբինետի ղեկավարի մամուլի ծառայությունը։
Դրա տեղեկություններով՝ պատվիրակության կազմում էին ՌԴ էներգետիկայի նախարար Սերգեյ Ցիվիլևը, նրա առաջին տեղակալ Պավել Սորոկինը և Մերձավոր Արևելքի և Աֆրիկայի երկրներում ՌԴ նախագահի հատուկ ներկայացուցիչ, ՌԴ փոխարտգործնախարար Միխայիլ Բոգդանովը։
«Հանդիպմանը քննարկվել են երկկողմ հարաբերությունները և դրանց զարգացման ու ամրապնդման ուղիները տարբեր ոլորտներում, մասնավորապես էներգետիկայի, արհեստական ինտելեկտի օգտագործման և թվային ոլորտում համագործակցության։
Բանակցությունների ընթացքում կողմերն ընդգծել են Իրաքի և Ռուսաստանի միջև պատմական կապերի կարևորությունը, քանի որ 2024 թվականին երկու երկրները նշել են դիվանագիտական հարաբերությունների հաստատման 80-ամյակը»,- ասվում է ազգային լրատվական գործակալության մամուլի ծառայության հաղորդագրության մեջ։
