Ռուսական արժույթի շուկան գրեթե մեկ ամիս տևած անդորրից հետո կրկին անկում է ապրել, գրում է The Moscow Times-ը։
Հինգշաբթի Forex-ում դոլար/ռուբլի փոխարժեքը անցած տարվա հոկտեմբերից ի վեր առաջին անգամ հատեց 100 ռուբլու նշագիծը, իսկ Մոսկվայի բորսայում յուանի փոխարժեքը մոտեցել է տարեկան ռեկորդին։ Ըստ LSEG-ի՝ դոլարը Forex-ում ցատկել է մինչև 100,72 ռուբլի, եվրոն թանկացել է, հասնելով մինչև 105,63 ռուբլի։
Ռուսական միջբանկային շուկայում, որտեղ համաշխարհային արժույթները վաճառվում են մոսկովյան բորսայի պատժամիջոցների տակ մտնելուց հետո, դոլարի 100 ռուբլու նշագիծը մնացել է անփոփոխ։ Այս կամ ավելի բարձր գնանշումով գործարքներ չեն եղել, թեև բանկերը հեշտությամբ կարող էին գործարքներ կնքել հաճախորդների հետ 100-ից բարձր փոխարժեքով, Reuters-ին հայտնել են թրեյդերները: Յուանի փոխարժեքը հասել է 13,72 ռուբլու՝ 8 կոպեկով պակասելով 2023 թվականի հոկտեմբերից ի վեր նոր ռեկորդից։
Ռուբլու թուլացման հաջորդ ալիքը կապված է «արտաքին առևտրի բացասական գործոնների հետ», նշում է վերլուծաբան Դմիտրի Բաբինը։ Կենտրոնական բանկի տվյալներով՝ հոկտեմբերին տնտեսության արտահանման եկամուտները սեպտեմբերի համեմատ նվազել են գրեթե 10%-ով՝ հասնելով 36 միլիարդ դոլարի, իսկ առևտրային հաշվեկշռի հավելուրդը 12,6 միլիարդ դոլարից նվազել է մինչև 11,8 միլիարդ դոլար։
