Միացյալ Նահանգների վարչակազմը դեմ է Բեյրութին Իսրայելի օդային հարվածներին: Այս մասին լրագրողների հետ հերթական ճեպազրույցում հայտարարել է ԱՄՆ Պետդեպարտամենտի մամուլի ծառայության ղեկավարի տեղակալ Վեդանտ Պատելը։
Նրան հարցրել են, թե արդյոք Վաշինգտոնը մտահոգված չէ Լիբանանի մայրաքաղաքին իսրայելական ավիահարվածով, որը չորեքշաբթի օրը 21 մարդու կյանք է խլել:
«Իհարկե, մենք մտահոգված ենք: Դուք մեզանից բազմիցս լսել եք, որ մենք չենք ցանկանում նման կանոնավոր գործողություններ տեսնել Բեյրութում, հատկապես խիտ բնակեցված վայրերում: Սա մի բան է, որին մենք կշարունակենք հատուկ ուշադրություն դարձնել Իսրայելում մեր գործընկերների հետ շփումներում»,- պատասխանել է դիվանագետը։
Նա վերահաստատել է Իսրայելի և Լիբանանի միջև հակամարտությունը դիվանագիտական լուծում տալու անհրաժեշտությունը՝ համաձայն ՄԱԿ-ի Անվտանգության խորհրդի 1701 բանաձևի, որը պետք է թույլ տա խաղաղ բնակիչներին Կապույտ գծի երկու կողմերում (Լիբանանի և Իսրայելի միջև սահմանի երկայնքով տեղակայված ՄԱԿ-ի խաղաղապահների սաղավարտների գույնն է) վերադառնալու իրենց տները:
