«Հրապարակ»-ը գրում է.Հուլիսի 2-ին Արցախի ԱԺ նախագահ Աշոտ Դանիելյանի անսպասելի հրաժարականից հետո ավելի քան մեկ ամիս է՝ այդ պաշտոնը թափուր է: ԱԺ խորհրդարանականները նրան փոխարինողի հարցն են քննարկում։
Մենք մի քանի հրապարակում ենք արել՝ տեղեկացնելով, որ պատգամավորներից որեւէ մեկը հանձն չի առնում՝ ստեղծված իրավիճակում զբաղեցնել այդ պաշտոնը՝ կանխատեսելով, որ հայտնվելու է պետության պատժիչ մեքենայի թրթուրների տակ։ Իրավիճակը փորձել էին իրենց ձեռքը վերցնել արցախցի ՀԿ սեկտորի ներկայացուցիչները, նախորդ շաբաթ Արցախի պետնախարար Նժդեհ Իսկանդարյանի եւ հասարակական գործիչ Անաստաս Իսրայելյանի թեկնածությունների հարցն են ներկայացուցչությունում քննարկել, սակայն պատգամավորները դեմ են երկուսին էլ ու որոշել էին, որ օգոստոսի 18-ին ներկայացուցչությունում նորից կհավաքվեն ու իրենց միջից՝ որեւէ խմբակցությունից Արցախի ԱԺ նախագահի թեկնածու կառաջադրեն։
Տեղեկացանք, սակայն, որ հավաքը չի կայացել։ Մեր աղբյուրների փոխանցմամբ, ավելի վաղ են փորձել հավաքվել, սակայն դաշնակցական Արթուր Մոսիյանը երկրից բացակայել է, սպասել են նրան: Հիմա էլ վերադարձել է, բայց, մեր տեղեկություններով, ԱԺ նախագահի պարտականությունները կատարող Բաղունցին չի հաջողվել պատգամավորներին իրար գլխի հավաքել։ Խորհրդարանականների անպատասխանատու պահվածքից փորձում են օգտվել ՀԿ սեկտորի ներկայացուցիչները։ Նախօրեին անանուն մի հաղորդագրություն էին տարածել, թե Արցախի նախագահի լավագույն թեկնածուն քաղաքագետ Ստեփան Հասան-Ջալալյանն է։Փաստորեն, արցախցի պատգամավորները որոշել են տեղի տալ Փաշինյանի ճնշումներին եւ սեփական անգործությամբ նպաստում են նրա նպատակների իրականացմանը` Արցախի պետական ինստիտուտների ոչնչացմանը։
