«Հրապարակ»-ը գրում է.Մենք տեղեկացանք, որ Քաղաքաշինության կոմիտեի նախկին նախագահ, Տավուշի նախկին մարզպետ Արմեն Ղուլարյանը չնայած այն բանին, որ 2024 թվականի հունվարին է վերջին պաշտոնը լքել, հույսը չի կորցնում, որ վերադառնալու է պետական համակարգ եւ նոր պաշտոն է ստանալու: Մեկ անգամ պաշտոն զբաղեցրած եւ պետբյուջեից հեշտ փողեր վաստակած մարդիկ այլեւս երբեք չեն մոռանում այդ «հաճույքը» եւ միշտ ձգտում են վերադառնալ այդ կարգավիճակին:
Ղուլարյանին մոտ կանգնած աղբյուրը մեզ պատմեց, որ վերջինս, առանց որեւէ պատճառի ու բացատրության, պաշտոնը կորցնելուց հետո էլ շարունակում է աջակցել Նիկոլ Փաշինյանին, անգամ շատ հաճախ վիճաբանության մեջ է մտնում շրջապատում, երբ որեւէ մեկը քննադատական խոսք է ասում Նիկոլ Փաշինյանի մասին, այն հույսով, որ դա կհասցնեն Փաշինյանին:
Մենք նկատեցինք, որ Ղուլարյանը բավականին ակտիվ է ֆեյսբուքյան հարթակում: Նա պարբերաբար Նիկոլ Փաշինյանի եւ ՔՊ-ականների ելույթներով է իր էջում կիսվում, երբեմն իշխանավորներին ուղղված մեկնաբանություններ է գրում, նրանց գործերին հաջողություն մաղթում:
