Հուլիսի 30-ին Պլեխանովի անվան Ռուսաստանի տնտեսագիտական համալսարանի (ՌՏՀ) Երևանի մասնաճյուղում տեղի ունեցավ 2026 թվականի բակալավրիատի և քոլեջի շրջանավարտների դիպլոմների հանձնման հանդիսավոր արարողությունը։
Այս օրը շրջանավարտների համար դարձավ կյանքի ամենահիշարժան ու կարևոր իրադարձություններից մեկը։ Երջանիկ ժպիտները, հուզմունքը, հարազատների շնորհավորանքներն ու ձեռքերում պահված երկար սպասված դիպլոմները վկայում էին տարիների հետևողական աշխատանքի և ձեռքբերումների մասին։
Արարողությունը բացեց մասնաճյուղի տնօրեն, պատմական գիտությունների թեկնածու, Ռուսաստանի Դաշնության կրթության ոլորտի պատվավոր աշխատող Թամարա Ռազմիկի Վարդանյանը։
Ողջունելով շրջանավարտներին՝ նա նշեց. «Վստահ եմ, որ այս օրը երկար կմնա ձեր հիշողության մեջ։ Այսօր դուք ստանում եք ոչ միայն բարձրագույն կրթության մասին փաստաթուղթ, այլև ձեր աշխատասիրության, նպատակասլացության և գիտելիքի հանդեպ նվիրումի խորհրդանիշը։ Տեխնոլոգիաների արագ զարգացող աշխարհում կարևոր է ոչ միայն մասնագիտական գիտելիքներ ունենալը, այլև կարողանալ լայն մտածել, լինել ստեղծագործ և պատրաստ՝ դիմագրավելու ժամանակի նոր մարտահրավերներին»։
Թամարա Վարդանյանը նաև ընդգծեց, որ մասնաճյուղը հպարտանում է իր ուսանողներով, ովքեր տարիներ շարունակ աչքի են ընկել ոչ միայն ուսման մեջ, այլև գիտական, հասարակական, մշակութային և մարզական կյանքում՝ արժանապատվորեն ներկայացնելով համալսարանը տարբեր հարթակներում։
«Հիշե՛ք՝ իրական հաջողությունը պայմանավորված է ոչ միայն գիտելիքներով, այլև ազնվությամբ, պատասխանատվությամբ, բարեվարքությամբ և հասարակության ու պետության հանդեպ ծառայելու պատրաստակամությամբ»,– նշեց մասնաճյուղի տնօրենը։
Շրջանավարտներին շնորհավորեց նաև Հայաստանի Հանրապետությունում Ռուսաստանի Դաշնության դեսպանության խորհրդական Ալեքսանդր Իգորի Նովիկովը։
«Ձեր դիպլոմը վստահելի ուղեգիր է դեպի մասնագիտական կյանք, ամուր հիմք և որակի վկայագիր, որը ճանաչված է ինչպես Ռուսաստանում, այնպես էլ Հայաստանում։ Համարձակորեն կյանքի կոչե՛ք ձեր գաղափարներն ու նախաձեռնությունները և երբեք մի՛ սահմանափակվեք արդեն ձեռք բերածով»,– ասաց նա։
Շրջանավարտներին իր բարեմաղթանքները հղեց նաև Երևանում Ռուսական տան ղեկավարի տեղակալ Եկատերինա Անդրեևան՝ մաղթելով նրանց հաջողություններ մասնագիտական գործունեության, ձեռնարկատիրության և գիտության ոլորտներում, ինչպես նաև նոր գաղափարներ, ստեղծագործ մոտեցումներ և նշանակալի ձեռքբերումներ։
2026 թվականին Երևանի Պլեխանովի անվան ՌՏՀ մասնաճյուղի բակալավրիատն ու քոլեջն ավարտեցին ավելի քան 150 շրջանավարտներ։
Արարողության ավարտին, արդեն ձևավորված ավանդույթի համաձայն, շրջանավարտները երկինք բաց թողեցին օդապարիկներ, որոնք խորհրդանշում էին նոր երազանքներ, լայն հնարավորություններ և ապագա հաջողություններ։
Թող այս օրը երկար մնա շրջանավարտների հիշողության մեջ, իսկ Պլեխանովի անվան ՌՏՀ Երևանի մասնաճյուղը նրանց համար միշտ լինի ջերմ հիշողությունների, արժեքավոր գիտելիքների և կյանքի կարևոր ձեռքբերումների խորհրդանիշ։
Բարի՛ երթ, սիրելի՛ շրջանավարտներ։ Թող ձեր մասնագիտական ուղին լի լինի հաջողություններով, համարձակ նախաձեռնություններով և նոր նվաճումներով։
