Արեգակնային համակարգից դուրս գտնվող WD 1856 b անունով էկզոմոլորակի ուսումնասիրության արդյունքում գիտնականները ուշագրավ փաստ են բացահայտել։ Այն միլիարդավոր տարիներ շարունակել է ապրել իր արևանման աստղի մահից հետո:
Էկզոմոլորակը գտնվում է 81 լուսատարի հեռավորության վրա՝ Վիշապի համաստեղությունում։
Հետազոտության համաձայն՝ WD 1856 b-ն գազային հսկա է, որի զանգվածը շուրջ ութ անգամ գերազանցում է Յուպիտերի զանգվածը։ Նրա մթնոլորտի ջերմաստիճանը մոտ 127 աստիճան Ցելսիուս է, ինչը գիտնականների համար անսպասելիորեն բարձր ցուցանիշ է։
Մոլորակը պտտվում է սպիտակ թզուկին չափազանց մոտ՝ Երկիր-Արեգակ հեռավորությունից մոտ 50 անգամ ավելի մոտ, և մեկ ամբողջական պտույտ կատարում է ընդամենը 1,4 օրում։ Գիտնականների կարծիքով՝ այն սկզբում գտնվել է ավելի հեռու, սակայն ժամանակի ընթացքում աստիճանաբար մոտեցել է իր աստղին։
WD 1856 b-ն կարևոր օրինակ է այն բանի, որ որոշ մոլորակներ կարող են գոյատևել իրենց մայր աստղի մահից հետո։ Սա նաև հուշում է, որ ապագայում Արեգակի մահից հետո Արեգակնային համակարգի որոշ մոլորակներ նույնպես կարող են պահպանվել։
Միևնույն ժամանակ, գիտնականները դեռ փորձում են պարզել, թե ինչպես է այս մոլորակը հայտնվել իր ներկայիս՝ չափազանց մոտ ուղեծրում։ Խնդիրն ավելի բարդ է դարձնում այն, որ սպիտակ թզուկը միայնակ չէ․ այն եռակի աստղային համակարգի մի մասն է և ուղեկցվում է երկու կարմիր թզուկ աստղերով, որոնցից յուրաքանչյուրի զանգվածը կազմում է Արեգակի զանգվածի մոտ 30 տոկոսը։
