Ամեն ինչից զատ, սա պարզապես նաև անմարդկային է. «Փաստ»

«Փաստ» օրաթերթը գրում է.

Այն, որ Նիկոլ Փաշինյանն անցել է բացահայտ քաղաքական տեռորի նոր փուլի, նույնիսկ ինքն արդեն չի թաքցնում:

Ու ընդդիմադիրների, ընդդիմախոսների, նկատելի, հանրային ակտիվություն դրսևորող գործիչների դեմ հերթով գործեր են «կարում»: Այն, որ այս բոլոր խուզարկությունները, ձերբակալությունները, կալանավորումները բացահայտ ու բացարձակ քաղաքական աստառ ունեն, նույնպես ակնհայտ է:

Դրանում ոչ ոք չի էլ կասկածում: Երևի թե նույնիսկ մեկ անձի հրահանգներն իրականացնողները: Բայց, ի լրումն վերը ասվածին, այս ամենի մեջ կա ևս մեկ հանգամանք, որը առավել քան դիպուկ բնորոշում ու ցույց է տալիս թե՛ այս իշխանության, թե՛ նրա հրամանները կատարող իրավապահ համակարգի իրական դեմքն ու էությունը:

Տեսեք, վերջին օրերին ՀՅԴ ԳՄ ներկայացուցիչ Իշխան Սաղաթելյանի բնակարանը խուզարկելու, «ՀայաՔվեի» համակարգող Ավետիք Չալաբյանին ձերբակալելու և տունը խուզարկելու, դրանից առաջ՝ Ռուբեն Հակոբյանին ձերբակալելու համար իրավապահները գնացել էին առավոտյան ժամը 7-8-ին: Նույնը՝ «Մայր Հայաստանի» ղեկավար Անդրանիկ Թևանյանի դեպքում՝ մեկ ամիս առաջ:

Նույնը՝ էլի տարբեր անձանց դեպքերում, տարբեր ժամանակներում: Այսինքն, գեստապոյականների կամ «նկվդականների» ոճով առավոտ կանուխ, դեռ լույսը կարգին չբացված՝ ներխուժում են մարդկանց տներ, որտեղ կան ընտանքի անդամներ՝ կին, երեխաներ, հնարավոր է՝ տարեց ծնողներ:

Մարդկանց քնահարամ են անում, երեխաներին ահաբեկում, կանանց սպառնում, բոլորին տեռորի ենթարկում: Պարզ է, չէ՞, թե ինչ հոգեբանական ծանր նստվածք է մնալու հատկապես փոքրահասակ երեխաների դեպքում:

Պարզ է, չէ՞, որ դրանով հոգեբանական անջնջելի վնասվածք եք պատճառում հատկապես կանանց ու երեխաներին: Թե ինչ նպատակ են հետապնդում այս մեթոդները, դժվար է ասել:

Բայց դա, ամեն ինչից անկախ, նաև պարզապես անմարդկային է: Իսկ մարդ լինել՝ թեկուզ հրահանգներ կատարելիս, երևի թե կարելի է...

Մանրամասները՝ «Փաստ» օրաթերթի այսօրվա համարում